Багануурын иргэд амны хаалт үйлдвэрлэж байна
МОНГОЛЫН МЭДЭЭ | НИЙГЭМУлаанбаатар /МОНЦАМЭ/. Нийслэлийн Багануур дүүргийн ЖДҮ-ийг дэмжих төвийн оёдолчид өдөрт 1000 амны хаалт хийж дүүргийнхээ болон нийслэлийнхний хэрэгцээнд нийлүүлж байна.
Тус төвөөс гараагаа эхлүүлсэн оёдлын үйлдвэрүүд “Багануур” ХК-ийн ажилчдын нормын хувцас, дүүргийнхээ сургуулийн сурагчдын форм, биеийн тамирын хувцас үйлдвэрлэдэг болсон талаар нийслэлийн Засаг дарга С.Амарсайханыг Багануур дүүрэгт ажиллах үеэр танилцууллаа.
Хотын захирагч С.Амарсайхан ЖДҮ-ийг дэмжих төвийн ажилчдад хандан амжилт хүсээд жижиг дунд үйлдвэрийг жинхэнэ утгаар нь хөгжүүлж байгаа дүүргийн удирдлагуудад талархал илэрхийлж, нийслэлээс бүхий л талаар дэмжин ажиллахаа хэллээ.
Улаанбаатар хотын Захирагч, нийслэлийн Онцгой байдлын комиссын дарга С.Амарсайхан мөн Багануур дүүргийн халдвартын эмнэлгийн үйл ажиллагааны бэлэн байдлыг шалгалаа. Тус эмнэлэг нь дүүргийнхээ төдийгүй зүүн бүсийн 3 аймгийн иргэд болон Төв аймгийн сумдад үйлчилдэг юм байна. Тус эмнэлэг коронавирус илэрсэн тохиолдолд яаралтай тусламж үйлчилгээ үзүүлэхээр 30 ортой 15 тусгай тасгийг бэлэн болгосноо танилцуулав.
Хотын захирагч, НОК-ын дарга С.Амарсайхан, эрсдэл учирсан онцгой тохиолдолд хэрэгжүүлэх бэлтгэл ажил хангагдсаныг сайшааж, сэрэмжлүүлэг мэдээллийг дүүргийн хэмжээнд сайн хүргэж ажиллахыг эмч мэргэжилтнүүдэд захилаа.