Ulaanbaatar
Дэлхийгээр аялагчид “Хариуцлагатай аялцгаая” аянд нэгдлээ
МОНГОЛЫН МЭДЭЭ | ГХЯ-НЫ МЭДЭЭ
Улаанбаатар /МОНЦАМЭ/. Гадаад харилцааны яам, “Дэлхийгээр Аялагчид Ворлд Вандерерс” ХХК-ийн хооронд хилийн дээс алхаж буй монгол иргэдэд шаардлагатай мэдээ, мэдээллийг хүргэх, хувийн хариуцлагыг нэмэгдүүлэх, соён гэгээрүүлэх зорилгоор хамтын ажиллагааны санамж бичиг энэ сарын 17-нд байгууллаа.
Энэхүү санамж бичгийн хүрээнд, ГХЯ-наас АНУ болон БНСУ-ын Элчин сайдын яамдтай хамтран 2017 оноос эхлэн хэрэгжүүлж буй “Хариуцлагатай аялцгаая” аяны цар хүрээг өргөжүүлэх, гадаадад зорчих иргэдэд албан ёсны мэдээ, мэдээлэл, зөвлөмжийг түгээх, “Үүргэвчтэй аялал – 2” нэвтрүүлэг бэлтгэхэд туслах зэргээр хамтран ажиллах юм.
Олон нийтийн сүлжээнд идэвхтэй үйл ажиллагаа явуулдаг, 500 гаруй мянган дагагч гишүүнтэй “Дэлхийгээр аялагчид ворлд вандерерс” групптэй ийнхүү хамтран ажиллах болсноор Монгол Улсын иргэдийн гадаадад зорчих нөхцөлийг улам сайжруулах, иргэдийн хувийн хариуцлагыг нэмэгдүүлэх замаар эх орноо гадаадад сурталчлахад томоохон түлхэц үзүүлэх ач холбогдолтой болно.
