Ulaanbaatar
Э.Энхсайхан Монголын биатлоны түүхэн амжилт үзүүлэв
МОНГОЛЫН МЭДЭЭ | СПОРТ
Улаанбаатар /МОНЦАМЭ/. "Лозанн-2020" Залуучуудын өвлийн олимпын биатлоны эрэгтэйчүүдийн ганцаарчилсан төрөлд Монголын тамирчин Э.Энхсайхан 36:50.9 цагийн амжилтаар 12 дугаар байрт шалгарч Монголын цанын спортын биатлоны төрөлд гаргасан түүхэн амжилт үзүүллээ хэмээн МҮОХ-ноос мэдээллээ.
Түүний уралдсан эрэгтэйчүүдийн
12.5 км зайд 99 тамирчин өрсөлдсөнөөс 98 тамирчин барианд орж, ОХУ-ын
биатлонч Домичек Олег 34:09.4 цагийн амжилтаар олимпын аварга болжээ.
Харин эмэгтэйчүүдийн 10 км зайд нийт 97 тамирчин өрсөлдсөнөөс 93 тамирчин барианд орж, ОХУ-ын тамирчин Мохова Алена 32:26.7 амжилтаар аваргын алтан медалийг хүртлээ. Монголын биатлонч Ч.Бямбасүрэн 46:48.2 цагийн амжилтаар 87 дугаар байрт орсон байна.
Ийнхүү Залуучуудын өвлийн олимпын биатлоны эрэгтэй, эмэгтэй ганцаарчилсан зайн төрлүүд шилдгүүдээ шалгаруулав. Биатлоны эрэгтэй, эмэгтэй ойрын зайн төрлүүд өнөөдөр /01.14/ Улаанбаатар хотын цагаар 17:30 цагт явагдах бөгөөд MNB Sport сувгаар шууд дамжуулах юм.
Ташрамд сонирхуулахад, Монгол
Улс цанын спортын биатлоны төрлөөр өвлийн олимпын наадамд оролцсон түүхийг
сөхвөл, 1964 оны нэгдүгээр сарын 29-нөөс хоёрдугаар сарын 9-нд Австри улсын
Инсбрук хотноо болсон өвлийн олимпын IX наадамд Б.Дамдинжав,
Б.Дашгай, Ц.Данзан, Т.Лхамсүрэн нар анх
удаа оролцсон. Түүнээс хойш “Гренобль-1968” өвлийн олимпын X наадамд биатлоны төрлөөр Б.Дамдинжав,
Б.Дашгай нар оролцож байсан юм.
