Ulaanbaatar
Сонгуулийн тухай хуулийг мөрдөж ажиллахыг анхааруулав
МОНГОЛЫН МЭДЭЭШӨХТГ-аас УИХ-ын болон аймаг, нийслэлийн ИТХ-ын сонгуультай холбогдуулж нийт хэвлэл мэдээллийн байгууллагуудад хандан, Сонгуулийн тухай хуулийг мөрдөж ажиллахыг анхаарууллаа.
Сонгуультай холбоотой чансаа тогтоох зорилго агуулсан, бусдыг гүтгэн доромжилсон, аливаа хэлбэрийн хуурамч мэдээ, мэдээлэл нийтлэхгүй байхыг тус газраас анхааруулж байгаа ба зөрчил гаргасан тохиолдолд Сонгуулийн тухай хуульд заасан арга хэмжээ авах гэнэ.
Сонгуулийн тухай хуулийн 70 дугаар зүйл, 70.1.6-д ээлжит сонгуулийн жил эхэлснээс хойш санал хурааж дуустал аливаа этгээд сонгогчдын саналыг татах зорилгоор “хэвлэл мэдээллийн хэрэгсэл, цахим орон зай, мессеж ашиглан улс төрийн чансаа тогтоох зорилго бүхий аливаа хэлбэрийн шалгаруулалт зохион байгуулах, бусдыг гүтгэн доромжлох, хуурамч мэдээлэл тараахыг хориглоно”, 70 дугаар зүйл, 70.7-д “аливаа хэвлэл мэдээллийн байгууллага сонгуулийн сурталчилгааны үеэр сонгуульд оролцогч аль нэг талын талаар бүх төрлийн мэдээ, мэдээлэл гаргах, гаргахгүй байхаар амлалт авах, гэрээ байгуулахыг хориглоно” гэж заасан.
Дээрх заалтыг зөрчсөн хэвлэл мэдээллийн байгууллагын үйл ажиллагаа эрхлэх тусгай зөвшөөрлийг 6 сар хүртэл, цахим хуудасны хандалтыг 6 сарын хугацаагаар шударга өрсөлдөөний асуудал хариуцсан төрийн захиргааны байгууллагын дүгнэлтийг үндэслэн тухайн зөвшөөрөл олгосон байгууллага түдгэлзүүлэхээр хуульчилсан байна.
Б.Туул
