Ulaanbaatar
Хөлбөмбөгийн аймгуудын шигшээд 3 баг тэргүүлж эхэллээ
МОНГОЛЫН МЭДЭЭ | СПОРТ
Улаанбаатар /МОНЦАМЭ/. Монгол Улсын Ерөнхийлөгчийн ивээл дор жил бүр уламжлал болгон зохион байгуулдаг 21 аймгийн аварга шалгаруулах хөлбөмбөгийн тэмцээн 3 дахь өдрөө үргэлжилж байна.
Увс аймгийн төв
Улаангомд болж буй тус тэмцээний
нэгдүгээр шатны хэсгийн хоёр дахь тоглолтууд өчигдөр боллоо. Нэгдүгээр шатын А хэсгийн
тоглолт Өмнөговь болон Завхан аймгийн багийн хооронд болж 15:2 харьцаатай ялалт
байгуулснаар Өмнөговийн баг 6 оноотой хэсгээ тэргүүлж эхэллээ.
Хэсгийн дараагийн тоглолт Баян-Өлгий болон Хөвсгөл аймгийн багийн хооронд тун сонирхолтой явагдаж 3:2 харьцаагаар Баян-Өлгийн баг хожсоноор хэсгээ 6 оноотой Өмнөговь аймгийн багтай хамт тэргүүлж байна.
В хэсгийн тоглолт Хэнтий болон Төв аймгийн багийн хооронд явагдаж 18:2 харьцаатайгаар Төв аймгийн шигшээ баг өрсөлдөгчөө хожив.
Өчигдрийн хамгийн сонирхолтой өрсөлдөөнтэй тоглолт хэсгийн эхний тоглолтуудад хожил байгуулаад байсан Сэлэнгэ болон
Говь-Алтай аймгийн багийн хооронд боллоо. Тус тоглолтод Сэлэнгэ аймгийн шигшээ баг
торгуулийн цохилтыг алдахад Говь-Алтай аймгийн багаас эцсийн мөчид торгуулийн
цохилтоос гоолдож 1-0 харьцаатай хожсоноор хэсгээ 6 оноотой мөн тэргүүлж эхэллээ.
