Ulaanbaatar
Г.Занабазарын нэрэмжит Дүрслэх урлагийн музейн уран бүтээлчид “Нэгэн дээвэр дор” үзэсгэлэнгээ нээлээ
МОНГОЛЫН МЭДЭЭ | СОЁЛ УРЛАГ
Улаанбаатар, 2025 оны тавдугаар сарын 29 /МОНЦАМЭ/. Дүрслэх урлагийн долоо хоног буюу “Art week Ulaanbaatar-2025"- ын хүрээнд Г.Занабазарын нэрэмжит Дүрслэх урлагийн музейд "Нэгэн дээвэр дор" үзэсгэлэнг өнөөдөр дэлгэлээ.
Соёлын яам, Монголын Урчуудын Эвлэл хамтран зохион байгуулж буй тус үзэсгэлэнд Г.Занабазарын нэрэмжит Дүрслэх урлагийн музейн дөрвөн уран бүтээлч бүтээлээ толилуулж байна. Эдгээр уран бүтээлч нэгэн дээвэр дор хамтран бүтээлээ бүтээсэн учир үзэсгэлэнгээ “Нэгэн дээвэр дор” хэмээн нэрийджээ.
Сэргээн засварлагч, зураач Р.Чинзориг энэ үзэсгэлэнд 20 гаруй бүтээлээрээ оролцож байна. Тэрбээр монгол зургийн
чиглэлээр төгссөн учраас монгол зургийг гол болгожээ. Мөн хадны зураг, монгол
зураг, эсгий чихмэл гэх мэтийн урлагийн
төрөл бүтээлд нь багтсан байна.
Сэргээн засварлагч, зураач Р.Чинзориг: Эдгээр бүтээлээс эсгийгээр хийсэн өлгийг онцолж байна. Уран
бүтээлч хүний өнцгөөр хүний ухамсрыг өсөж бойжуулж, өлгийдөж, түүнийгээ хөгжүүлж нүх гаргасан нь хүний нүдний хэсэг юм. Энэ нь хүн нас биед хүрсэн ч гэсэн ухамсар нь бүрэн гүйцэд хөгжөөгүй байдаг. Баяр баясгалантай байх, энэрч өршөөх, уучилж хайрлах,
нигүүлсэнгүй чанарыг хөгжүүлээсэй гэсэн агуулгатай. Өлгийг гадаад амьдралтай
харьцаж бүрэн гүйцэд хөгжихийн тулд хүүхдийг бойжуулж тэр дотор хамгаалж дулаахан,
таатай, хоол ундаар тасалдахгүй байлгаж байна гэж үздэг. Энэ бүтээлийг билгийн
мэлмий талаас нь онцолж харуулсан. Билгийн мэлмий гэдэг нь өнгөрсөн, одоо,
ирээдүй гурван цагийг зэрэг хардаг гэж үздэг. Тэр билэгдлийн агуулгаар өнөөдөр
бидний байгаа зүйл маргаашийг бүтээнэ гэсэн санаа. Одоо болон ирээдүй рүү
хандаж байгаа үйлдэлдээ анхаараарай гэсэн агуулгыг давтаж байгаа.
ГХОНХХэлтсийн
дарга, зураач Ц.Баттуяа үзэсгэлэнд 19 бүтээлээр оролцож байна. Эдгээр бүтээлээс
онцлох бүтээл нь “Ээж мод” бүтээл юм. Эл бүтээлээ 2014 онд бүтээж дэлхий дээр байгаа эх бүр өөрсдийн гэсэн үр удамтай, тэр нь цаашаа өсөж үржээд
дэлгэрч үр хүүхэд, удам нь өөр өөрийн гэсэн өнгө төрхтэй байгаагаар зохиомжилж монгол
зургийн аргаар зуржээ. Уран бүтээлч Ц.Баттуяа ихэвчлэн мод сэдвийн дор уран
бүтээлээ туурвидаг.
Энэхүү үзэсгэлэнд Г.Занабазарын нэрэмжит Дүрслэх урлагийн музейн захирал, Урлаг судлалын ухааны доктор (Ph.D) П.Байгалмаа, ГХОНХХэлтсийн дарга, зураач Ц.Баттуяа, Сэргээн засварлагч, зураач Р.Чинзориг, Тайлбарлагч, дизайнер, зураач Н.Хулан нар 50 гаруй бүтээлээ дэлгэжээ. Мөн тус музейн ажилчид боловсролын хөтөлбөрийн хүрээнд зурсан зургаа толилуулж байна. Уг үзэсгэлэн өнөөдрөөс зургаадугаар сарын 4-нийг хүртэл үргэлжлэх аж.
