Ulaanbaatar
ДАРХАН-УУЛ: Мэдээллийн аюулгүй байдлыг хангах чиглэлээр сургалтад хамрагдлаа
ОРОН НУТГИЙН МЭДЭЭ | ДАРХАН-УУЛ
Дархан, 2025 оны наймдугаар сарын 28 /МОНЦАМЭ/. Дархан-Уул аймгийн ИТХ-ын дэргэдэх ГХУСАЗСЗ, аймгийн ЗДТГ, Дархан сумын ЗДТГ, Төрийн цахим үйлчилгээний хэлтэс, Цагдаагийн газар хамтран дижитал үндэстэн сургалтыг зохион байгууллаа. Сургалтад Дархан, Сэлэнгэ, Төв аймгийн мэдээллийн технологийн байгууллагын мэргэжилтнүүд, мэдээлэл зүйн багш нар зэрэг 270 гаруй хүн оролцов.
Сургалтын гол зорилго нь хиймэл оюун ухаан, мэдээллийн технологийн хурдацтай хөгжилтэй зэрэгцэн нэмэгдэж буй цахим орчин дахь эрсдэлийг бууруулах, мэдээллийн аюулгүй байдлыг хангах, мэргэжилтнүүдийн чадавхыг нэмэгдүүлэхэд чиглэжээ.
Сүүлийн жилүүдэд хиймэл оюун ухаан болон мэдээллийн технологи хурдацтай хөгжиж, хүн төрөлхтний амьдралын бүх салбарт нэвтэрч байгаа ч мэдээлэл цуглуулах, боловсруулах, шийдвэр гаргах процессыг автоматжуулахын зэрэгцээ шинэ эрсдэл дагуулж буйг мэргэжилтнүүд онцолж байна.
Хиймэл оюун ухаанд суурилсан ChatGPT, Gemini, Claude зэрэг хэлний загварууд нь хүний оролцоогүйгээр томоохон хэмжээний мэдээллийг задлан шинжлэх, бичвэр үүсгэх боломжтой болсон нь мэдээллийн үнэн бодит байдал, хүний сэтгэхүйд үзүүлэх нөлөө, deepfake технологи буюу хуурамч мэдээлэл түгээх эрсдэлийг нэмэгдүүлж байна.
Монгол Улсад кибер халдлагын тоо 2024 онд өмнөх оныхоос 40 хувиар өссөн бөгөөд үүний ихэнх нь төрийн болон санхүүгийн байгууллага руу чиглэсэн байна. Дархан-Уул аймагт 2025 оны байдлаар цахим орчинд үйлдэгдсэн 200 гаруй гэмт хэрэг бүртгэгджээ.
Сургалтаар хиймэл оюун ухаан болон кибер аюулгүй байдлын талаарх хууль, журам, стандартыг боловсронгуй болгох, Мэдээллийн аюулгүй байдлын чиглэлээр мэргэшсэн инженер, шинжээчдийг бэлтгэх, иргэдийн кибер соёл, цахим аюулгүй байдлын мэдлэгийг дээшлүүлэх сургалт, мэдээлэл сурталчилгааг тогтмол зохион байгуулах шаардлагатайг сургалтад оролцогчид онцолж байна.
Кибер аюулгүй байдал зөвхөн мэргэжилтнүүдийн санаа зовох, үүний эсрэг хийх арга хэмжээ бус бүх нийтийн оролцоотой хамгаалалт гэдгийг ч тодотгож байна.
Сургуулийн орчин, төрийн байгууллагын кибер аюулгүй байдлыг хэрхэн хангах, цаашид хэрхэн уялдаа холбоотой байж аливаа халдлага, гэмт хэргээс урьдчилан сэргийлэхэд төвийн бүсийн сургалтад оролцсон оролцогчид харилцан мэдээлэл солилцож хамтран ажиллахаар боллоо.
Ташрамд Монгол Улсын Засгийн газрын Шинэ сэргэлтийн бодлого, “Цахим үндэстэн” хөтөлбөртэй уялдуулан аймгийн ГХУСАЗСЗ, Цагдаагийн газар, Төрийн цахим үйлчилгээний хэлтэс хамтран “Дарханчууд залилуулахгүй” аяныг зохион байгуулж байна.
Энэ хүрээнд аймгийн ИТХ-ын Цахим
бодлогын хорооны гишүүн төлөөлөгчид сургалтад оролцож бодлого боловсруулах,
шийдвэр гаргах түвшинд хэрхэн ажиллах талаар харилцан мэдээлэл солилцлоо.
