Ulaanbaatar
ХАМАС дахин нэг хүний цогцсыг шилжүүлэн өгчээ
ДЭЛХИЙН МЭДЭЭ | УЛС ТӨР
ГАЗА, 2025 оны арваннэгдүгээр сарын 6 /BBC/. Барьцаанд байсан хүний цогцос бүхий авсыг ХАМАС бүлэглэлийнхэн Улаан загалмай нийгэмлэгт хүлээлгэн өгсөн гэж Израилын цэргийнхэн мэдэгджээ. Цогцсыг Тель-Авив дахь Анагаах ухааны үндэсний төвд таниулахаар авчирна.
АНУ-ын зуучлалаар сар орчмын өмнө эхэлсэн гал зогсоох хэлэлцээрийн эхний үе шатанд ХАМАС бүлэглэлийнхэн барьцаанд байгаа 20 хүн болон амиа алдсан 28 хүний цогцсыг Израилын талд 72 цагийн дотор шилжүүлэн өгөхөөр тохиролцсон юм. Израилын зүгээс ХАМАС бүлэглэлийг "амиа алдсан барьцааны хүмүүсийн цогцсыг олох ажлыг санаатайгаар хойшлуулсан" гэж буруутгаж байгаа бол ХАМАС бүлэглэл цогцсуудыг нурангин доороос олоход бэрхшээлтэй байгаа гэж мэдэгдэж байв.
Хэрэв хамгийн сүүлд хүлээлгэн өгсөн цогцосны үлдэгдэл нь амиа алдсан барьцааны хүний цогцос болох нь батлагдвал Газад Израилын болон гадаадын иргэдийн зургаан хүний цогцос байсаар байна гэсэн үг юм. ХАМАС-ын барьцаанд эсэн мэнд байсан израилчуудыг 10 дугаар сарын 13-нд 250 палестин хоригдол, Газаас ирсэн 1718 хоригдлоор солилцон сулласан билээ. Израилын тал мөн барьцааны хүмүүсийн цогцсыг хүлээн авсны хариуд 300 палестин хүний цогцсыг шилжүүлэн өгчээ.
Барьцаанд байсан хүмүүсийн цогцсыг шилжүүлэн өгөх ажиллагаа
удаашралтай байгаа нь Ерөнхийлөгч Д.Трампын Газын энхийн төлөвлөгөөний хоёр
дахь үе шатанд ахиц гарахгүй байгаа гэсэн үг юм. Энэхүү үе шатанд Газын засаглал,
Израилын цэргүүдийг гаргах, ХАМАС-ын зэвсгийг хураах, сэргээн босгох төлөвлөгөө
багтаж байна.
Израилын тал Палестины зэвсэгт бүлэглэлийн гишүүд болон Улаан загалмай нийгэмлэгийн ажилтнуудад Израилын цэргийн хяналтад байгаа бүс нутгуудад цогцосны үлдэгдлийг хайхыг зөвшөөрчээ. 2023 оны 10 дугаар сарын 7-нд Израил руу хийсэн ХАМАС-ын гэнэтийн дайралтын үеэр 1200 орчим хүн амиа алдаж, 251 хүн барьцаалагдсан юм. Израилын тал хариуд нь Газад цэргийн ажиллагаа эхлүүлсэн бөгөөд энэ ажиллагааны үеэр 68 800 гаруй хүн амиа алдсан гэж ХАМАС-ын хяналтад байдаг Эрүүл мэндийн яам мэдэгджээ.
