Ulaanbaatar
СЭЛЭНГЭ: Сант суманд Цэргийн тангараг өргөх ёслол боллоо
ФОТО МЭДЭЭ
Сүхбаатар, 2025 оны арваннэгдүгээр сарын 29
/МОНЦАМЭ/. Зэвсэгт хүчний 110 дугаар ангиас хугацаат цэргийн алба
хаагчдынхаа эх орондоо үнэнчийн баталгаа болсон Цэргийн тангараг өргөх ёслолын
ажиллагааг Сэлэнгэ аймгийн Сант суманд зохион байгууллаа.
Бууриа сэлгэн шинэ орчин, шинэ байршилд төвхнөсөн тус ангийн тангараг өргөх ёслолын үйл ажиллагаанд Зэвсэгт хүчний Жанжин штабын орлогч
дарга, бригадын генерал Б.Баатар, Сэлэнгэ аймгийн засаг дарга Н.Лхагвадорж,
Барилга инженерийн цэргийн удирдах газрын даргын орлогч, штабын дарга хурандаа
Д.Жигжидсүрэн, Сэлэнгэ аймгийн цэргийн штабын дарга хурандаа С.Давааням,
Сэлэнгэ аймгийн Сант сумын засаг дарга С.Шижирбаатар, Сант сумын нутгийн
удирдлага, ард иргэд, хугацаат цэргийн алба хаагчдын ар гэрийн төлөөлөл оролцлоо.
Ёслолын үеэр Зэвсэгт хүчний 110
дугаар ангийн дайчин уламжлал, алдар гавьяаны илэрхийлэл, бие бүрэлдэхүүний
эрхэмлэн дээдлэх ариун шүтээн, золбоо хийморийн бэлгэдэл болсон Байлдааны
тугийг хүндэтгэн залж, шинэ дайчид тангарагаа өргөлөө.
Энэ үеэр нутгийн ард иргэдээс хуучин орхигдсон байсан ХААИС-ийн барилга, байгууламжийг сэргээн засварлаж, тус бүс нутагт жишиг анги болсон Барилга-инженер, экологийн анги байгуулж байгаад талархал илэрхийлж байв.
Тус анги нь дээрх бүтээн
байгуулалтаас гадна Хөвсгөл аймгийн Хатгал тосгон, Сэлэнгэ аймгийн Ерөө сумын
Бугант тосгон, Эрдэнэт хотуудад томоохон бүтээн байгуулалтын ажлуудыг хийж
гүйцэтгэсэн байна.
Шинэхэн дайчид тангараг өргөсний
дараа цэргийн анхан шатны бэлтгэлийг амжилттай зохион байгуулсан офицер, ахлагч
нарт Булган аймгийн цэргийн штабаас "Талархлын бичиг" гардуулж, бусдыгаа
манлайлсан зарим дайчдыг "Онц буудагч", "Онц сурлагатан",
"Тамирчин дайчин" тэмдгээр шагналаа.
