Ulaanbaatar
Токиогийн үзэсгэлэнгийн үеэр хүн дүрст роботууд анхаарал татаж байна
ДЭЛХИЙН МЭДЭЭ | СОНИН ХАЧИН
ТОКИО, 2025 оны арванхоёрдугаар сарын 4 /NHK/. Японы нийслэл Токио хотноо болж буй хамгийн сүүлийн үеийн роботын технологиудыг танилцуулах үзэсгэлэнгийн үеэр хиймэл оюун ухаан бүхий роботууд олны анхаарлыг ихэд татаж байна.
Токиогийн Кото дүүрэгт лхагва гарагт эхэлсэн олон улсын роботын үзэсгэлэнд Японы болон гадаадын 670 гаруй компани, судалгааны байгууллага оролцож байгаа ажээ.
Энэ үеэр Японы машин механизм үйлдвэрлэгч томоохон компани болох “Kawasaki Heavy Industries”-ийн асарт хамгийн сүүлийн үеийн хүн дүрст роботыг танилцуулжээ. Алсын удирдлагатай андройд төхөөрөмж нь галыг унтрааж, тоглоомон муурыг аварч үзүүлсэн байна.
Харин Японы аж үйлдвэрийн робот үйлдвэрлэгч “Fanuc”
компани дуу хоолойн командыг ойлгох чадвартай хиймэл оюун ухаантай робот гарыг танилцуулжээ. Үүнд шоог авч, бүгд тавын тоог харуулахаар эвлүүл гэж хэлэхэд гар дээр
суурилуулсан камер нь гурван шоог ажиглаж, нэг нэгээр нь аваад бүгдийг нь тавын
тоо харуулан эвлүүлсэн байна.
Хятад, АНУ-ын компаниуд хиймэл оюун ухааны тусламжтайгаар хүн дүрст роботууд
болон дэвшилтэт хөдөлгөөнтэй робот гарыг хөгжүүлэх ажлыг улам идэвхтэй хийж байгаа
юм. Роботуудыг хүмүүст аюултай газруудад ажиллуулах эсвэл ажиллах хүчний
хомсдолыг арилгахад тус дөхөм болно хэмээн найдаж
байна.
“Kawasaki Heavy Industries” компанийн гүйцэтгэх захирал Мацүда
Йошимото NHK телевизэд ярилцлага өгөхдөө, роботууд байгалийн гамшигт
нэрвэгдсэн бүс дэх хүмүүсийн очих боломжгүй газруудад даалгавар гүйцэтгэж чадна гэлээ.
Хүн дүрст роботууд тоног хэрэгслүүдийг хүмүүстэй адилаар ашиглаж чаддаг болно гэж тэрбээр
хэлээд, хүмүүстэй зэрэгцэн ажиллах чадвартай робот бүтээхийг хүсэж байгаагаа илэрхийлжээ.
Үзэсгэлэн бямба гараг хүртэл үргэлжилнэ.
