Маргаашнаас эхлэн ихэнх нутгаар цас орж шуурна

МОНГОЛЫН МЭДЭЭ
mn_tuul@montsame.mn
2016-12-30 11:30:58

Энэ сарын 31-нээс ирэх сарын 4-нийг хүртэлх хугацаанд цаг агаар ямар байх төлвийг цаг уурын байгууллагаас мэдээллээ.

Маргааш баруун болон төвийн аймгуудын нутгаар, нөгөөдөр төвийн аймгуудын зүүн хэсэг, зүүн аймгуудын нутгаар, 2-нд нутгийн хойд хэсгээр цас орж, зөөлөн цасан шуурга шуурна. Салхи 31-нд болон нэгдүгээр сарын 1-нд зарим газраар, 2-нд зүүн аймгуудын нутгаар секундэд 12-14 метр хүрч ширүүсэх нь.

Увс нуурын болон Дархадын хотгор, Идэр, Тэс, Ерөө голын хөндий, Хүрэн бэлчир орчмоор шөнөдөө 34-39 градус, өдөртөө 22-27 градус, Хангай, Хөвсгөл, Хэнтэйн уулархаг нутаг, Орхон-Сэлэнгэ, Эг, Хараа, Туул, Тэрэлж, Хэрлэн, Онон, Улз, Халх голын хөндийгөөр шөнөдөө 28-33 градус, өдөртөө 13-18 градус, говийн бүс нутгийн өмнөд хэсгээр шөнөдөө 11-16 градус, өдөртөө 1-6 градус, бусад нутгаар шөнөдөө 18-23 градус, өдөртөө 6-11 градус хүйтэн байх аж.

Харин ирэх сарын 2-ноос ихэнх нутгаар хүйтний эрч сулрах гэнэ.

Б.Туул

Связанные новости