Сэлэнгэ/МОНЦАМЭ/.Сэлэнгэ аймгийн төв Сүхбаатар суманд баригдсан төрийн албан хаагчдын 120 айлын орон сууцны эхний 80 айлын байр ашиглалтад орж, албан ёсны нээлтээ өнөөдөр хийлээ. 

Энэхүү байрны давуу тал нь төрийн албан хаагчид хүүгүй, урьдчилгаа төлбөргүйгээр орон сууцтай болж байгаа явдал юм. Сэлэнгэ аймгийн төрийн албан хаагчид ийм уян хатан нөхцөлтэйгөөр орон сууцтай болж буй үйл явдал нь Монгол Улсад анхны тохиолдол гэдгээрээ онцлогтой юм. Энэхүү орон сууц нь 2018 онд сууриа тавьсан бөгөөд 6.2 тэрбум төгрөгийн өртөгтэйгөөр, орон нутгийн өөрийн хөрөнгөөр сүндэрлэж байгаа гэдгээрээ давуу чанартай. Ингээд бодит бүтээн байгуулалт болсон үйл ажиллагаанаас хийсэн сурвалжилгаа хүргэе.

Төрийн албан хаагчид хүүгүй, урьдчилгаа төлбөргүйгээр орон сууцтай боллоо

Улсдаа анхдагч, шилдэг бүтээн байгуулалт болсон үйл ажиллагаа нь Сэлэнгэ аймгийн ИТХ-ын Тэргүүлэгчдийн 2014 оны 80 дугаар тогтоолоор батлагдсан “Сэлэнгэ орон сууц” хөтөлбөр юм.

Тус хөтөлбөр Сэлэнгэ аймгийн Засаг даргын 2016-2020 оны үйл ажиллагааны хөтөлбөрийн зорилтын хүрээнд хийгдэж байгаа ажил юм. Төрийн албан хаагчийн 120 айлын төсөлд эхний ээлжид Сэлэнгэ аймагт үйл ажиллагаа явуулж буй 43 төсөвт байгууллагын 120 албан хаагч хамрагдаж байна. Сэлэнгэ аймагт үйл ажиллагаа явуулдаг “Таванхан” ХХК уг төслийн гүйцэтгэгчээр шалгаран эхний ээлжийн нэг, хоёрдугаар блокийн 80 айлын орон сууцыг энэ сарын 8-нд ашиглалтад оруулж, бэлэгт сайн энэ өдөр нээлтийн үйл ажиллагааг зохион байгууллаа. Үйл ажиллагаанд Сэлэнгэ аймгийн Засаг дарга Ш.Оргил, Засаг даргын орлогч Ж.Сайнцог, УИХ-ын гишүүн Ч.Ундрам, Сүхбаатар сумын ИТХ-ын дарга Ц.Ариунтуяа, сумын Засаг дарга Т.Гантулга болон албаны бусад хүмүүс оролцлоо. Үйл ажиллагаанд оролцсон УИХ-ын гишүүн Ч.Ундрам: -“Сэлэнгэ аймгийн иргэдийг чанартай, хямд үнэтэй орон сууцаар хангах зорилготойгоор энэ сайхан ажлыг эхлүүлсэн байна. Энд маш олон хүний хүч хөдөлмөр, дэмжлэг, туслалцаа орсон.

Сэлэнгэ аймгийн 43 төрийн байгууллагын 120 айл тав тухтай орчин нөхцөлд амьдрах боломж өнөөдөр бүрдэж байгаад маш их талархаж байна. Миний бие уг бүтээн байгуулалтын ажлыг эрчимжүүлэх, цаг хугацаанд нь дуусгах үүднээс санхүүгийн зарим зохицуулалтыг хийж оролцсон байгаа. Санаж, зорьсон ажил маань амжилттай хэрэгжсэнд маш их баяртай байна. Урьдчилгаа төлбөр, зээлийн хүү, зээлийн хугацааны хувьд төрийн албан хаагчдад харьцангуй боломжийн нөхцөл олгож буй энэ төсөл орон нутагт хэрэгжүүлэх жишиг хөтөлбөр болно гэдэгт итгэж байна. Бид цаашид аймгийнхаа иргэдийг хямд үнэтэй, чанартай орон сууцаар хангах ажлыг бодлого, төлөвлөлттэйгөөр үргэлжлүүлэн хэрэгжүүлнэ. Шинэ байранд орсон нутгийн ахан дүүс та бүхэндээ аз жаргал, сайн сайхан бүхнийг хүсэн ерөөе. Энэ төслийг дэмжин ажилласан Сэлэнгэ аймгийн ИТХ, Засаг дарга, ЗДТГ, гүйцэтгэл зохион байгуулалтыг хийсэн баг хамт олонд талархал илэрхийлж, амжилт хүсье. Сайн үйлс бүхэн дэлгэрэх болтугай” хэмээв.  

Ц.Дарьсүрэн: Урьдчилгаагүй, хүүгүйгээр байртай болно гэдэг  тэнгэрийн од шүүрэхтэй адил юм

Сэлэнгэ аймгийн ЭМГ-ын мэргэжилтэн Д.Дарьсүрэн: -“Өнөөдөр төрийн албан хаагчдын 120 айлын орон сууцны эхний 80 айлын байр ашиглалтад орж нээлтээ хийж байна. Энэхүү төслийг санаачлан хэрэгжүүлж байгаа аймгийн засаг дарга Ш.Оргил болон үүнийг хэрэгжүүлж байгаа албан байгууллагуудад чин сэтгэлээсээ талархаж байна.  Би төрийн албан хаагч, манай нөхөр бас төрийн албан хаагч. Бид хоёр төрд ажиллаад 8-9 жилийг ардаа үджээ. Энэ хугацаанд залуу гэр бүл, төрийн албан хаагч бид өөрийн гэсэн орон сууц авах гэж их үзсэн. Гэхдээ яагаад ч боломж бүрдэж өгөхгүй байлаа. Учир нь банкны урьдчилгаа, хүү гээд асар их өндөр зээл төлөх байсан учраас чадаагүй. Гэтэл ийм сайхан боломжтой нөхцөлөөр байртай болж байгаадаа туйлын их баяртай байна. Энэ бол банкны урьдчилгаагүй, хүүгүйгээр бидэнд олдож байгаа нь үнэхээр тэнгэрийн од шүүрэхтэй адил юм болж байна. Маш их талархалтай хандаж байгаа. Бусад төрийн албан хаагчдын адил квот сугалсан. Бүх төрийн албан хаагчдад дахин дахин баяр хүргэе. Миний эцэг эх төрд насаараа ажиллаж байгаад тэтгэвэртээ гарсан. 60 гарсан хүмүүс байгаа. Тэд насаараа ажиллаад орон сууцтай болж чадаагүй байхад үр хүүхэд бид нь аз тохиогоод ийм сайхан байртай боллоо. Ингээд аймгийн удирдлагууд түүний багийнханд дахин талархаж буйгаа илэрхийлье” гэлээ.

Ц.Эрдэнэчимэг: Эрүүл энхийн манаанд цаг наргүй ажилладаг эмч нар айлаас айлын байр дамжихаа болилоо

Сэлэнгэ аймгийн НЭ-ийн дарга Ц.Эрдэнэчимэг: -“Өнөөдөр Сэлэнгэ аймгийн Сүхбаатар суманд амьдарч байгаа 120 өрхийн магнай тэнийсэн баярын өдөр болж байна. Тэр дундаа хүн ардынхаа эрүүл энхийн манаанд цаг наргүй ажилладаг эмч нар маань айлаас айлын байр дамжихаа больж, 15 эмч өөрийн гэсэн орон байртай болж байна. Байхгүйн зовлон хэцүү. Энэ бүгдийг эцэс болгож хүүгүй, урьдчилгаагүйгээр орон сууцтай болох боломж үндэс суурийг тавьж өглөө. Ингээд аймгийн ИТХ, аймгийн ЗДТГ, төрийн албан хаагчийн орон сууц хөтөлбөрийг санаачлагч аймгийн Засаг дарга Ш.Оргил, хэрэгжүүлэгч М.Тэмүүлэн захиралтай "Сэлэнгэ орон сууц" ОНӨААТҮГ, гүйцэтгэгч н.Энхтөр захиралтай "Таван хан" ХХК-ийн хамт олон, дэмжин ажилласан УИХ-ын гишүүн Ч.Ундрам, хамтран ажилласан Б.Ганболд захиралтай "Сэлэнгэ АЗЗА" компанийн хамт олонд чин сэтгэлийн талархал илэрхийлж, ажилд нь өндөр амжилт хүсье” гэв.

Хамгийн залуу төрийн албан хаагч М.Анхбаярт хөргөгчөөр мялаалга хүртээв

Шинэ байранд орсон иргэдийн тухайд гурван өрөө байранд орсон нь сард ердөө 500 гаруй мянган төгрөгийг найман жилийн хугацаанд төлөөд илүү ямар ч зардалгүйгээр  өөрийн гэсэн байртай болж буй юм.

Нээлтийн үйл ажиллагааны үеэр болсон бас нэгэн баярт мөч бол аймгийн Засаг дарга Ш.Оргил хамгийн залуу гэр бүлийг шалгаруулан хөргөгч бэлэглэсэн явдал байв. Баяр дээр баяр нэмсэн азын шагналын эзнээр аймгийн Онцгой байдлын газрын гал сөнөөгч, М.Анхбаяр байлаа. Мөн үеэр блок тус бүрээс нэг нэг айлыг азтанаар тодруулж нэг сая төгрөгийн үнэ бүхий гал зуухны тавилгаар урамшуулсан явдал байв. Үүнийг аймгийн Засаг дарга залуусаа дэмжсэн, урам зориг хайрласан, ажил үйлсэд нь дэм өгсөн үйл явдлууд болж байгаа шүү гэдгээ нээлтийн үеэр онцлон хэлсэн юм.

Ташрамд Сэлэнгэ аймагт сүндэрлэж буй төрийн албан хаагчийн байрны төслийн үйл ажиллагааг хэрэгжүүлж байгаа байгууллага бол “Сэлэнгэ орон сууц” ОНӨААТҮГ. Тус байгууллага аймгийн Засаг даргын дэргэдэх байгууллага. Энэ байгууллага нь аймгийн Засаг даргын 2016-2020 оны үйл ажиллагааны мөрийн хөтөлбөрийн хэрэгжилт, зорилтын дагуу тус бүтээн байгуулалтын ажлыг зохион байгуулжээ. Харин гүйцэтгэгч байгууллага нь Сэлэнгэ аймгийн “Таван хан Уул” ХХК юм.