Ulaanbaatar
Эрчим хүчний сайд П.Ганхүү гавъяат тамирчин Б.Гангаамаад амжилт хүсэв
МОНГОЛЫН МЭДЭЭ | НИЙГЭМ
Эрчим хүчний сайд П.Ганхүү Монгол Улсын Гавъяат тамирчин, ОУХМ Б.Гангаамааг хүлээн авч уулзлаа.
Сайд П.Ганхүү “Дэлхийн 7 тивийн ноён оргилд гарах нь уулчин хүний хүсэл мөрөөдөл юм. Уулын спортын чансаа, оргилыг тодорхойлох эл үзүүлэлтийг өнөөдрийн байдлаар дэлхийн хэмжээнд 148 тамирчин хангасан байдаг. 2016 оны 12 дугаар сарын 15-ны өдрөөс эхлэн “Винсон Массиф” өөд авирах спортын их үйл хэргийг тань манай хамт олон дэмжиж, уулчин хүний их зориг, тэсвэр хатуужлыг бид үнэлж байна. Дэлхийн ноён оргилд Монгол Улсынхаа төрийн далбааг мандуулсан сайхан мэдээтэй эргэн уулзана гэдэгт итгэлтэй байна” гэв.
Тэгвэл Монгол Улсын Гавъяат тамирчин, ОУХМ Б.Гангаамаа эх орныхоо нэрийг дэлхийн уулын спортын тавцанд гаргахаар бэлтгэл хангаж байна. Тэрээр дэлхийн зургаан тивийн Эльбрус, Эверэст, Килиманжаро, Денали, Акокагуа, Карстенз Пирамид зэрэг ноён оргилд хөл тавьж,эх орныхоо далбааг мандуулсан юм. Харин одоо Антарктид тивийн ноён оргил болох 4897 метрийн өндөр “Винсон Массиф”-т гарах л үлдсэн нь монголчуудын хувьд түүхэн амжилтад нэрээ тамгалахад ойрхон байна.
Б.Заяа
