Ulaanbaatar
П.Орхон И.Ярыгины нэрэмжит тэмцээний хошой алтан медальтан болов
МОНГОЛЫН МЭДЭЭ
Алдарт бөх Иван Ярыгины нэрэмжит чөлөөт бөхийн олон улсын тэмцээн гурван өдөр үргэлжилж шилдгүүдээ тодруулав.
Тус тэмцээний хоёр дахь өдөр 75 кг-д Г.Уртнасан анхны алтан медалиа зүүв. Гавьяат дасгалжуулагч З.Дүвчингийн шавийн алтан медаль нь манай бөхчүүдийн энэ тэмцээнээс авсан 10 дахь алтан медаль байв. 53 кг-д Д.Отгонцэцэг мөнгөн медаль хүртсэнээр тус тэмцээний алт, мөнгө, хүрэл медалийн бүрэн цуглуулгатай боллоо. Харин энэ жинд Э.Сумьяа тус тэмцээний 3 дахь хүрэл медалиа хүртжээ.
55 кг-д А.Батцэцэг хүрэл медалийн төлөө барилдаанд Э.Даваачимэгийг 2:1 онооны харьцаагаар хожиж хүрэл медалийн эзэн болов. Тэрбээр тус тэмцээний хошой хүрэл, мөнгөн медальт бөх болж байна. 63 кг-д ОУХМ П.Орхон хагас шигшээ барилдаанд Японы бөх Аяка Итог 10:0 оноогоор дийлж алтан медалийн төлөө Инна Тражуковаг 7:6 оноогоор хожиж энэ тэмцээний анхны хошой алтан медальт бөх болов. Түүний багш Гавьяат дасгалжуулагч Ц.Хосбаяр түүнээс дутахгүй баярлав.
Манай эмэгтэй бөхчүүд энэ тэмцээнд амжилттай оролцож хошой алт, мөнгө, 5 хүрэл нийт 9 медаль хүртсэн бол эрэгтэй бөхчүүд нэг хүрэл медаль авлаа. Эрэгтэйчүүдийн 125 кг-д Н.Золбоо хүрэл медаль хүртсэн юм.
Д.Өлзий
