Ачаалж байна…
Ачаалж байна…
Davaasuren Adiyasuren

Мандалговь, 2026 оны арваннэгдүгээр сарын 18 /МОНЦАМЭ/. Дундговь аймгийн Нэгдсэн эмнэлэг болон Хулд сумын Нэгдсэн эмнэлэгт БНСУ-ын Сөүл хотын Онцгой байдлын газраас хандивласан, эмнэлгийн зориулалтын тоног төхөөрөмжөөр бүрэн тоноглогдсон хоёр авто машиныг хүлээлгэн өглөө. Нийт гурван авто машин хандивлахаар шийдвэрлэснээс хоёр нь ирсэн бөгөөд гурав дахь авто машин нэмж ирэхээр болжээ.
Дундговь аймгийн 15 сумаас одоогийн байдлаар есөн сумын эрүүл мэндийн байгууллага Эрүүл мэндийн яам болон Орон нутгийн хөгжлийн сангийн хөрөнгө оруулалтаар эмнэлгийн авто машинтай болсон байна. Түүнчлэн 2024 оноос хойш машины хангамжийг нэмэгдүүлэх чиглэлээр ажилласны үр дүнд 2026 онд хоёр сум эмнэлгийн зориулалтын машинтай болсон байна.
Өмнө нь зориулалтын авто машингүй зарим сумын эрүүл мэндийн байгууллага хандив, тусламжаар ирсэн фургон болон жижиг оврын суудлын машинаар иргэдэд тусламж, үйлчилгээ үзүүлж, дуудлагад хүрдэг байв. Гэвч эдгээр машин нь өвчтөн тээвэрлэх, эмнэлгийн тусламжийг замд үзүүлэхэд шаардлагатай тоног төхөөрөмж, орчин нөхцөлийг бүрэн хангадаггүй байжээ.
Дундговь аймгийн хувьд сум, багууд хоорондоо хол, хүн амын суурьшил сийрэг, говийн бүсийн зам, цаг уурын онцлогоос шалтгаалан эмнэлгийн яаралтай тусламжийг шуурхай хүргэхэд зориулалтын авто машины хүртээмж, техникийн бэлэн байдал чухал юм.
Шинээр хүлээлгэн өгсөн хоёр машин нь эмнэлгийн байгууллагуудын тээврийн хэрэгслийн хангамжийг сайжруулах, өвчтөнийг шаардлагатай эмнэлэгт хүргэх, тээвэрлэлтийн явцад эмнэлгийн тусламж үзүүлэх нөхцөлийг бүрдүүлж, яаралтай тусламжийн үйлчилгээний шуурхай байдлыг нэмэгдүүлэхэд бодит дэмжлэг болно.
Авто машинуудыг орон нутагт хүргэхтэй холбоотой тээвэрлэлт, гааль болон татварын зардлыг Дундговь аймгийн нутгийн захиргааны байгууллагаас шийдвэрлэжээ.