Ачаалж байна…
Ачаалж байна…
Montsame News Agency

МОСКВА/ДУБЛИН, 2026 оны арваннэгдүгээр сарын 13 /Reuters/. ОХУ-ын Ерөнхийлөгч Владимир Путин Украины асуудлаарх энхийн хэлэлцээний дараагийн шатанд Европын төлөөлөгчдийг оролцуулахыг зөвшөөрсөн гэж АНУ-ын тусгай элч Стив Уиткофф пүрэв гарагт мэдэгдэв. Гэхдээ АНУ-ын тал Европын холбоотнуудынхаа байр суурийг, тодруулбал Украинд энх тайван тогтоохыг хүсэж байгаа эсэх, эсвэл дайн хийхийг зорьж байгаа эсэхийг тодруулах хэрэгтэй гэж Оросын удирдагч мэдэгджээ.
Европын орнуудын төлөөлөгчид дараагийн шатны уулзалтад хэлэлцээний ширээний ард суулгах энэхүү алхам нь ахиц гаргах чухал алхам болж магадгүй байна. Гэвч дайныг хэрхэн дуусгах асуудлаар Москва болон Европын орнуудын эрх баригчидын байр суурь эрс зөрүүтэй байгаа нь хэлэлцээ амаргүй болохыг В.Путиний мэдэгдэл харууллаа.
"Дараагийн уулзалтад Европын төлөөлөгчид оролцоно. Бид тэднийг түншүүдээ гэж үздэг бөгөөд хэлэлцээнд оролцох нь бидний хувьд чухал учраас энэ бол маш чухал үйл явдал гэж бодож байна" хэмээн С.Уиткофф Кремльд В.Путинтэй уулзсаныхаа дараа Оросын төрийн телевизэд ярьжээ.
Үүний дараа С.Уиткофф болон АНУ-ын Ерөнхийлөгчийн тусгай элч Жаред Кушнер нар Ирландыг зорьж, Украины Ерөнхийлөгч Владимир Зеленскийтэй уулзсан байна. В.Зеленский цаашид хэлэлцээний хэд хэдэн үе шаттай үргэлжлэх төлөвтэй байгаад, мөн Европын төлөөлөгчи тэдгээрт оролцох боломжтой болж байгаад баяртай байгаагаа илэрхийлжээ.
Кремльд болсон уулзалтын үеэр Ж.Кушнер Европын талын байр сууринд "томоохон өөрчлөлт" гарч байгааг АНУ-ын тал анзаарсан бөгөөд хэлэлцээнд Европын орнуудыг оролцуулах нь ахиц дэвшилд саад болохгүй гэдэгт итгэлтэй байгаагаа В.Путинд хэлсэн байна.
Харин В.Путин Украины асуудлаар Европын Холбоотой хэлэлцээ хийхэд Москва үргэлж нээлттэй байсаар ирсэн гэж мэдэгдээд, талуудын хооронд шийдвэрлэгдээгүй томоохон санал зөрөлдөөн байгааг онцолжээ.
Энэ долоо хоногт Абу-Дабид хоёр өдөр үргэлжилсэн гурван талын хэлэлцээ нь ОХУ, Украины хооронд АНУ-ын зуучлалаар зохион байгуулсан сүүлийн есөн сарын хугацаан дахь анхны шууд хэлэлцээ болсон юм.
Хэлэлцээнд тодорхой ахиц гарсан хэдий ч газар нутгийн асуудал зэрэг томоохон санал зөрөлдөөнүүд хэвээр байгааг Украин, Оросын талууд мэдэгдсэн. Оросын тал Украины газар нутгийн тавны нэг орчмыг хяналтдаа байлгаж байгаа бол Украины тал зүүн нутгийн Донбассын үлдсэн газар нутгийг өгөхөөс татгалзсаар байгаа юм.