Ачаалж байна…
Ачаалж байна…
Лхагвасүрэн Отгонбаатар

Дархан, 2026 оны арваннэгдүгээр сарын 18 /МОНЦАМЭ/. Төрийн албаны зөвлөл, Засгийн газрын хэрэг эрхлэх газар, Монгол Улсын хүний эрхийн Үндэсний комисс, Ёс зүйн хороо, Жендерийн үндэсний хороо, Удирдлагын академи, "Канад-Монголын Мерит" төсөл хамтран Төрийн албан хаагчийн чадавхыг бэхжүүлэх уулзалт, зөвлөгөөн Дархан хотод эхэллээ. Төвийн бүсийн уулзалт, зөвлөгөөн нь энэ сарын 18, 19-ний өдрүүдэд болно.
Энэхүү уулзалт нь төрийн албан хаагчдад хууль тогтоомж таниулах, төлөвлөлт, гүйцэтгэл, хяналт шинжилгээ, үнэлгээний чадавхыг сайжруулж, бэхжүүлэн иргэн төвтэй төрийн үйлчилгээг үр дүнд суурилсан арга хэлбэрээр хэрэгжүүлэх, төрийн байгууллага хоорондын уялдааг сайжруулж, хамтран ажиллах мэдлэг, ур чадварыг хөгжүүлэх зорилготой юм.
Төрийн албан хаагчдын ёс зүйн үзүүлэлт өмнөх онд 41.8 хувьтай үнэлэгдэж байсан бол энэ онд МУИС-аас хийсэн хөндлөнгийн судалгаагаар 54.2 хувьд хүрч, өмнөх оноос 12.4 хувиар өссөн эерэг үзүүлэлттэй гарчээ.
2025 онд төрийн захиргааны 1208 байгууллагын давхардсан тоогоор 25127 албан тушаалд хамаарах төрийн захиргааны албан тушаалын тодорхойлолтыг цахим системд бүртгэжээ. Үүнээс өөрчлөлт ороогүй 8556, шинэчилсэн болон засвар оруулсан 16571 албан тушаалд хамаарах албан тушаалын тодорхойлолт байна.
Төрийн албан хаагчид сахилгын шийтгэл ногдуулах, түүнд гомдол гаргах болон төрийн жинхэнэ албан хаагчийг өөр албан тушаалд шилжүүлэх, сэлгэн ажиллуулах журмын шинэчлэл сэдвээр албан хаагчдад мэдээлэл өгч хэлэлцүүлгээр асуулт хариултыг өрнүүллээ.
Мөн төрийн байгууллага, албан хаагчийн зүгээс иргэдийн эрх, эрх чөлөөг зөрчсөн асуудал, нөгөө талаас төрийн албан хаагчдын ажлын байрны дарамт, хөдөлмөрлөх эрхийн зөрчилтэй холбоотой гомдол зонхилж буйг ХЭҮК-ийн гишүүн тодотгож байна. Нийт өргөдөл, гомдлын 20 орчим хувь нь төрийн албан хаагчдын эрх, хууль ёсны ашиг сонирхол зөрчигдсөн асуудалтай холбоотой талаар дурдлаа.
Жендерийн үндэсний хорооны Ажлын албаны дарга А.Адилбиш хэлэхдээ: Ерөнхий сайдын тэргүүлдэг тус хороо нь жендерийн эрх тэгш байдлыг хангах тухай хууль тогтоомжийн хэрэгжилтийг зохион байгуулах, хангуулах үндсэн чиг үүрэгтэй. Манай улсын нийт хүн амын 51 хувийг эмэгтэйчүүд, 49 хувийг эрэгтэйчүүд эзэлж байна.
Аймаг, орон нутаг хөгжлийн бодлого, төлөвлөлт боловсруулахдаа жендерийн статистик мэдээлэлд тулгуурлаж, төсвийн хуваарилалт эмэгтэй, эрэгтэй иргэдийн амьдралын чанарт хэрхэн нөлөөлж байгааг анхаарах шаардлагатай дурдлаа.
Түүнчлэн эдийн засгийн өсөлтийн үр өгөөж өрх бүрд бодитоор хүрч, иргэдийн амьжиргаа, амьдралын чанарыг дээшлүүлэхэд чиглэсэн бодлого хэрэгжүүлэх нь чухал гэдгийг онцолж орон нутгийн шийдвэр гаргах түвшинд эмэгтэйчүүдийн оролцоо сүүлийн жилүүдэд нэмэгдээгүй байна гэв.
Уулзалтад Дархан-Уул, Сэлэнгэ, Төв, Булган, Орхон аймгийн 200 гаруй төрийн албан хаагч оролцож байна. Тэд төрийн албанд тулгамддаг асуудал, иргэн, төрийн албан хаагчийн харилцаа хандлага, ёс зүйн хэм хэмжээ, хүний эрхийн асуудлын талаар санал солилцох салбар хуралдаанууд зохион байгуулна.