Ачаалж байна…
Ачаалж байна…
Г.Буянжаргал Буяка

Зуунмод, 2026 оны арваннэгдүгээр сарын 18 /МОНЦАМЭ/. Монголын орчин үеийн утга зохиолыг үндэслэгч, соён гэгээрүүлэгч, төр, нийгмийн нэрт зүтгэлтэн, их зохиолч Дашдоржийн Нацагдоржийн мэндэлсний 120 жилийн ойд зориулсан “Зохиол амилсан нь” дүрийн тоглолтыг энэ сарын 17-ны өдөр Монгол Туургатан театр, Зуунмод сумын Соёлын төвтэй хамтран зохион байгууллаа. Энэхүү тоглолтод 150 хүн оролцсоны 103 нь хүүхэд байлаа.
Аймгийн Нийтийн Номын сангаас “Монгол бахархал – Бүтээлч сар” аяны хүрээнд зохион байгуулж буй “Түүхэн хүмүүн – Үндэсний бахархал” сэдэвт 7 хоногийн хүрээнд энэхүү үйл ажиллагааг зохион байгуулсан юм.
Тоглолтын зорилго нь Их зохиолчийн амьдрал, уран бүтээлийн өв, үнэ цэнийг хүүхэд залуус, олон нийтэд сурталчлан таниулах, ном унших сэдэл төрүүлэх, Монголын суут хүмүүн, түүхэн хүмүүсийн гавьяат үйлс, бүтээл туурвилыг тайзны урлагаар дамжуулан түгээн дэлгэрүүлэхэд чиглэсэн байв.
Энэхүү тэмцээний шүүгчээр Төв аймгийн “Монгол туургатан” театрын ерөнхий найруулагч, МУСТА Д.Цэрэнчимэд, жүжигчин, МУСТА Б.Ариунхишиг, Төв аймгийн Нийтийн номын сангийн номын санч МУСТА Б.Буяннэмэх нар ажиллаж, оролцогчдын дүр бүтээх ур чадвар, жүжиглэлт, тайзны соёл, зохиолын агуулгыг илэрхийлсэн байдлыг үнэлэн дүгнэв.
Дүрийн тоглолт нь хүүхэд, насанд хүрэгчид гэсэн 2 насны ангиллаар явагдаж, оролцогчид Монголын нэрт зохиолчдын зохиол бүтээлээс сонгон дүр бүтээж, жүжиглэх ур чадвар, уран сэтгэмж, тайзны илэрхийллээрээ өрсөлдлөө.
Уралдаанд нийт 8 баг оролцсоноос хүүхдийн төрөлд тэргүүн байрт Монгол Улсын Төрийн шагналт, Ардын уран зохиолч, Монголын хүүрнэл зохиолын нэрт төлөөлөгч Сэнгийн Эрдэнийн “Өвгөн шувуу” зохиолоор Төв аймгийн Политехникийн коллежийн “Ухаан далай номоос эхтэй” баг шалгарсан байна.
Дэд байрт их зохиолч Дашдоржийн Нацагдоржийн “Учиртай гурван толгой” дууриар Зуунмод сумын Ерөнхий боловсролын 1 дүгээр сургуулийн 12б ангийн “Айзам” баг шалгарсан бол гутгаар байрт Академич, Төрийн шагналт Бямбын Ренчингийн “Нууцыг задруулсан захиа” зохиолоор Зуунмод сумын Ерөнхий боловсролын 1 дүгээр сургуулийн 12а ангийн “Уухай” баг шалгарлаа.
Шилдэг дүрээр Төв Политехникийн коллежийн суралцагч Гансэлэм “Өвгөн шувуу” зохиолын Жав өвгөний дүрээр тодорчээ.
Насанд хүрэгчдийн төрөлд тэргүүн байрт Ардын уран зохиолч Дэндэвийн Пүрэвдоржийн “Хөх даалимбан тэрлэг зохиолоор Зуунмод сумын Ерөнхий боловсролын 3 дугаар сургуулийн “Дөл” баг шалгарсан бол дэд байрт академич, Төрийн шагналт Бямбын Ренчингийн “Нууцыг задруулсан захиа” зохиолоор Зуунмод сумын “Ирээдүй” цогцолбор цэцэрлэгийн “Ирээдүй” баг шалгарчээ.
Шилдэг дүрээр “Ирээдүй” цогцолбор цэцэрлэгийн багш Цэрэннадмид “Нууцыг задруулсан захиа” зохиолын Пүү жанжны дүрээр тус тус шалгарлаа.
“Зохиол амилсан нь” дүрийн тоглолт нь Монголын үндэсний уран зохиолын сор бүтээлүүдийг тайзны урлагаар дамжуулан амилуулж, хүүхэд залуус, насанд хүрэгчдийн ном унших сонирхол, уран зохиолын мэдлэг, гоо зүйн боловсролыг дээшлүүлэхэд чиглэсэн үр өгөөжтэй уралдаан болсныг шүүгчид онцолж байв.
Мөн их зохиолч Д.Нацагдоржийн мэндэлсний 120 жилийн ойг тохиолдуулан түүний амьдрал, уран бүтээлийг сурталчлан таниулж, үндэсний утга зохиолын өв соёлоо эрхэмлэн дээдлэх, эх оронч үзэл, үндэсний бахархлыг төлөвшүүлэхэд хувь нэмэр оруулсан онцлох ажил боллоо гэв.