Ачаалж байна…
Ачаалж байна…
Montsame News Agency

Улаанбаатар, 2026 оны арваннэгдүгээр сарын 16 /МОНЦАМЭ/. Япон Улсаас Монгол Улсад суугаа Элчин сайдын өргөмжлөл гардуулах ёслол Элчин сайдын өргөөнд энэ сарын 13-нд боллоо.
Энэхүү өргөмжлөлийг хоёр орны харилцааг өргөжүүлэн хөгжүүлэхэд үнэтэй хувь нэмэр оруулсан хувь хүн болон байгууллагад олгодог уламжлалтай.
Энэ удаа Элчин сайдын өргөмжлөлийг Г.Занабазарын нэрэмжит Дүрслэх урлагийн музейн захирал, урлаг судлалын ухааны доктор П.Байгалмаа, “UB Drums” хамтлагийн үүсгэн байгуулагч Б.Ганхөлөг нарт хүртээлээ. Энэхүү өргөмжлөл нь зөвхөн дипломат харилцаагаар хязгаарлагдахгүй боловсрол, шинжлэх ухаан, урлаг соёлын салбарын хамтын ажиллагааг хөгжүүлэхэд хувь нэмэр оруулсан хүмүүсийн хөдөлмөрийг үнэлдгээрээ онцлогтой юм.
Шагнал гардуулах ёслолын үеэр Япон Улсаас Монгол Улсад суугаа Онц бөгөөд Бүрэн эрхт Элчин сайд М.Игавахара хэлэхдээ, “Монгол, Японы харилцааг хөгжүүлэхэд хувь нэмрээ оруулсан тодорхой тооны хүмүүсийг сонгон Элчин сайдын нэрэмжит шагналыг олгодог. Энэ удаа дүрслэх урлаг, хөгжмийн салбарын хоёр хүн энэхүү шагналыг хүртлээ. Гэхдээ зөвхөн урлаг соёлын салбар гэлтгүй бүхий л салбарт бодит хувь нэмэр оруулсан хүмүүсийг энэхүү шагналаар урамшуулдаг” гэв.
Г.Занабазарын нэрэмжит Дүрслэх урлагийн музейн захирал, урлаг судлалын ухааны доктор П.Байгалмаа 2020 оноос тус музейг удирдан ажиллаж буй. 2000-аад оны эхэн үеэс Японы уран бүтээлчдийн олон удаагийн үзэсгэлэнг зохион байгуулж ирсний дотор 2022 онд болсон Монгол Улс, Япон Улс дипломат харилцаа тогтоосны 50 жилийн ойг тохиолдуулан “Япон постер”-ын үзэсгэлэн гаргаж, японтой холбоотой олон төрлийн соёлын үйл ажиллагааг санаачлан хэрэгжүүлжээ. Мөн 2023 онд Япон сангийн нүүдлийн “Японы хүүхэлдэйн үзэсгэлэн”-г Монголын үзэгчдэд хүргэснээс гадна 2027 онд “Японы гайхамшигт ур чадвар” үзэсгэлэнг хамтран хэрэгжүүлэхээр төлөвлөжээ. Г.Занабазарын нэрэмжит Дүрслэх урлагийн музей 1993 оноос Япон Улстай хамтын ажиллагаагаа эхлүүлсэн бөгөөд сүүлийн 20 гаруй жилийн хугацаанд японы соёл урлагийг таниулах 15 үзэсгэлэн гаргаснаас тэрбээр 11-ийг нь удирдан зохион байгуулсан аж.
Харин Морин хуурын найрал хөгжмийн цохивор хөгжимчин байсан Б.Ганхөлөг 1999 онд Японы тайко бөмбөртэй анх танилцсанаасаа хойш Японы уламжлалт бөмбөрийн урлагийг мэргэжлийн түвшинд тоглох замналаа эхлүүлжээ. 2015 онд Япон бөмбөрийн “UB Drums” хамтлагаа үүсгэн байгуулж, эдүгээ 30 орчим гишүүдийг удирдан, хөгжмийн ур чадвараас гадна японы ёс зүй, соёлыг өвлүүлэн зааж байна. Түүнчлэн “Жапан фестивал” зэрэг японтой холбоотой үйл ажиллагаанд идэвхтэй оролцон тоглолтоо толилуулж, Монголд Японы өвөрмөц хөг аялгууг хүргэсээр байна.
Япон Улсаас жил бүр өөр өөр салбарын төлөөллийг онцлон шагнаж ирсэн. Энэ удаа Монголын дүрслэх урлаг, хөгжмийн урлагийн төлөөлөл ийнхүү шагнал хүртлээ. Энэ нь хоёр орны соёлын харилцааг хөгжүүлэхэд уран бүтээлчид болон соёлын байгууллагын хамтын ажиллагаа чухал үүрэгтэйг харуулж буй юм.