Ачаалж байна…
Ачаалж байна…
Montsame News Agency

Улиастай, 2026 оны арваннэгдүгээр сарын 13 /МОНЦАМЭ/. Завхан аймгийн хойд сумдаар цас их хэмжээгээр орж, Тэс сумын хөдөө, хээрийн бүсэд 25–30 см зузаан цасан бүрхүүл тогтсоны улмаас авто замын зорчих хэсэг мөстөж, хөдөлгөөнд хүндрэл үүсжээ.
Алдархаан, Баянхайрхан, Цэцэн-Уул сумын зарим чиглэлийн авто замын хөдөлгөөн хаагдсан байна.
Энэ сарын 13-ны өдрийн байдлаар Сонгино суманд 24, Тэс суманд 23, Баянтэс суманд 21, Баянхайрхан, Түдэвтэй суманд 20 см зузаан цасан бүрхүүл тогтсон бол Нөмрөг суманд 12, Тосонцэнгэлд 10, Их-Уулд ес, Цэцэн-Уул, Яруу, Идэр суманд найман см цас оржээ. Харин Улиастай суманд зургаан см, зарим суманд 1–4 см цасан бүрхүүл тогтсон бол Сантмаргаз, Завханмандал, Эрдэнэхайрхан, Дөрвөлжин, Шилүүстэй суманд цас ороогүй байна.
Даваа, замын нөхцөл байдлын хувьд Загастайн даваанд цас үргэлжлэн орж, зорчих хэсэг халтиргаа, гулгаа ихтэй байгаа ч тээврийн хэрэгслийн хөдөлгөөн хэвийн үргэлжилж байна. Харин Солонготын даваанд цас будраад зогссон бөгөөд зам халтиргаа, гулгаатай байгаа ч хөдөлгөөн хэвийн байна. Солонготын даваа нь баруун аймгуудыг нийслэл болон төвийн бүсийн аймгуудтай холбодог улсын чанартай гол авто замын нэг хэсэг юм.
Одоогоор Алдархаан сумын Ганц, Баянхайрхан сумын Төөнт, Цэцэн-Уул сумын Цагаан дөрөлж чиглэлийн авто замын хөдөлгөөн хаагджээ.
Ялангуяа Тэс сумын хөдөө, хээрийн тэгш тал газраар цасны зузаан 25–30 см хүрч, мөстсөн зам дээр үргэлжлэн орсон цаснаас шалтгаалан автомашин зорчих боломжгүй нөхцөл үүссэн байна.
Иймд жолооч, тээвэрчид, иргэдийг цаг агаар, замын нөхцөл байдлыг харгалзан шаардлагагүй тохиолдолд холын замд зорчихгүй байх, зайлшгүй зорчих шаардлагатай бол тээврийн хэрэгслийн бүрэн бүтэн байдал, шатахууны нөөц, дулаан хувцас болон бусад аюулгүй байдлын бэлтгэлээ хангахыг Завхан аймгийн Онцгой байдлын газраас анхааруулж байна.