Ачаалж байна…
Ачаалж байна…
Монцамэ

Мандалговь, 2026 оны аравдугаар сарын 28 /МОНЦАМЭ/. Дундговь аймгийн “Тэнгэрийн тэмдэг” хүүхдийн театрын 21 сурагч “Их говийн цуурай” олон улсын хүүхдийн өв соёлын анхдугаар их наадамд оролцож, таван төрөлд тэргүүн байр, таван төрөлд дэд байр, хоёр төрөлд гуравдугаар байр эзлэн, нийт 12 шагнал хүртжээ.
Монгол Улсын Гавьяат жүжигчин, уртын дуучин Ж.Дорждагвын нэрэмжит тус театрын сурагчид уртын болон ардын дуу, морин хуур, эстрад дуу, хөгжмийн хамтлагийн төрлөөр өрсөлдсөн байна.
Уртын дууны багш, Монгол Улсын Гавьяат жүжигчин Ж.Дүнжмаагийн удирдлага дор 10 сурагч ардын болон уртын дууны гоцлол, хамтлагийн төрөлд амжилт гаргажээ.
Ардын дууны гоцлол төрөлд дунд насны ангилалд У.Эгшиглэн тэргүүн байр, Э.Цэрэнпунцаг дэд байр, ахлах насны ангилалд Б.Эрдэнэгомбо дэд байр эзэлсэн байна. Уртын дууны гоцлол төрөлд бага насны ангилалд Э.Тэлмүүн, дунд насны ангилалд У.Эгшиглэн тэргүүн байр, ахлах насны ангилалд Х.Хишигжаргал гуравдугаар байр хүртжээ. Мөн Э.Цэрэнпунцаг, Н.Эмүжин, Д.Анхчимэг, Б.Алтанцэцэг, Э.Тэлмүүн нарын бүрэлдэхүүнтэй хамтлаг уртын дууны хамтлагийн төрөлд тэргүүлсэн байна.
Хөгжмийн багш, Монгол Улсын Соёлын тэргүүний ажилтан Б.Орхонтуяагийн удирдсан 11 сурагч зургаан төрөлд өрсөлджээ. Уртын дууны гоцлол төрөлд ахлах насны ангилалд Б.Маралмаа тэргүүн байр эзэлсэн бол морин хуурын гоцлол төрөлд М.Бат-Эрдэнэ дэд байр, Б.Дамдинбазар гуравдугаар байр хүртсэн байна. Харин эстрад дууны гоцлол төрөлд Б.Маралмаа, эстрад дуу, хөгжмийн хамтлагийн төрөлд “Аяз” хамтлаг дэд байр эзэлжээ.
“Тэнгэрийн тэмдэг” хүүхдийн театр нь хүүхэд багачуудын авьяас чадварыг хөгжүүлэх, үндэсний урлаг, соёлын өвийг хойч үедээ өвлүүлэн уламжлуулах чиглэлээр үйл ажиллагаа явуулдаг. Тус театрын сургалтаар хүүхдүүд морин хуур, уртын болон ардын дуу, язгуур урлаг, үндэсний хөгжим зэрэг төрлөөр суралцаж, уралдаан, наадамд амжилттай оролцож байна.
Дундговь аймагт зохион байгуулдаг “Яргуй” хүүхдийн урлагийн бага наадамд 15 сумын ерөнхий боловсролын сургуулийн сурагчид, Политехник коллежийн оюутнууд оролцож, үндэсний урлагийн төрлөөр авьяас чадвараа сорьдог. Мөн “Тэнгэрийн тэмдэг” хүүхдийн театрын зохион байгуулсан “Шувуухай-2026” бүжгийн уралдаанд ерөнхий боловсролын сургуулийн 1-2 дугаар ангийн 12 хүүхэд монгол ардын бүжгийн төрлөөр оролцож, гутгаар байр эзэлсэн бөгөөд тус уралдаанд нийт 230 гаруй хүүхэд оролцжээ.
Түүнчлэн 2017 онд зохион байгуулсан язгуур урлагийн соёлын биет бус өвийг залгамжлагч хүүхдүүдийн улсын наадамд Улаанбаатар хотын Налайх дүүрэг болон Өмнөговь, Төв, Дундговь аймгаас нийт 130 хүүхэд оролцож байв.
Ийнхүү “Тэнгэрийн тэмдэг” хүүхдийн театрын сурагчид олон улсын наадмаас нийт 12 шагнал хүртэж, үндэсний урлаг, өв соёлоо эзэмшин хөгжүүлж буй авьяас чадвараа харууллаа.
