Ачаалж байна…
Ачаалж байна…
Montsame News Agency

ВАШИНГТОН, 2026 оны арваннэгдүгээр сарын 14 /TASS/. ОХУ-ын теннисчин Мирра Андреева эмэгтэй теннисчдийн холбооны (WTA) улирлын шилдгүүдийн шигшээ тэмцээний хэсгийн шатны тоглолтод нутаг нэгт Диана Шнайдерийг хожжээ. Тэмцээн АНУ-ын Индиан-Уэллс хотод болж байна.
М.Андреева 6:2, 6:1-ийн харьцаагаар хожсон байна. Тэрбээр Чехийн теннисчин Каролина Муховатай тоглохоор байсан боловч тоглолт эхлэхийн өмнөхөн К.Мухова ходоодны зовиурын улмаас тэмцээнээс хасагджээ. К.Мухова өмнөх хоёр тоглолтдоо хожигдсон тул хасагдах шатанд шалгарах боломжоо хэдийн алдсан байв.
Ингэснээр М.Андреева хэсгийн шатанд хийсэн гурван тоглолтдоо бүгдэд нь хожжээ. Тэрбээр эхний тоглолтдоо Украины теннисчин Элина Свитолинаг, хоёр дахь тоглолтдоо Беларусийн теннисчин Арина Соболенког тус бүр 6:4, 6:0-ийн харьцаагаар хожсон байна. WTA-ийн улирлын Хаалтын тэмцээний ганцаарчилсан төрөлд анх удаа оролцож буй М.Андреева хагас шигшээд АНУ-ын теннисчин Жессика Пегулатэй учраа таарна.
Өдгөө 19 настай М.Андреева дэлхийн чансааны гуравдугаарт эрэмбэлэгдэж байна. Тэрбээр WTA-гийн ганцаарчилсан төрлийн тэмцээнүүдэд зургаан удаа түрүүлжээ. Энэ оны зургаадугаар сард “Roland Garros” тэмцээнд түрүүлснээр Их дуулгын тэмцээний анхны түрүүгээ хүртсэн байна. Мөн 2024 оны Олимпын наадамд Диана Шнайдертэй хосын төрөлд өрсөлдөж, мөнгөн медаль хүртэж байжээ.
Өдгөө 22 настай Д.Шнайдер дэлхийн чансааны 11 дүгээр байрт бичигдэж байгаа бөгөөд WTA-гийн ганцаарчилсан төрлийн тэмцээнүүдэд мөн зургаан удаа түрүүлжээ. Түүний Их дуулгын тэмцээнүүдэд үзүүлсэн хамгийн өндөр амжилт нь 2026 оны “Roland Garros”-ын хагас шигшээд шалгарсан нь юм.
WTA-гийн улирлын Хаалтын тэмцээн хатуу хучилттай талбайд болж байгаа бөгөөд тэмцээний аварга энэ сарын 15-нд тодорно. Тэмцээний шагналын сан 10 сая ам.доллар юм. Улирлын турш хамгийн олон оноо цуглуулсан шилдэг найман теннисчин уг тэмцээнд оролцдог. Өнгөрсөн оны аварга Казахстаны теннисчин Елена Рыбакина эрүүл мэндийн шалтгаанаар энэ удаагийн тэмцээнээс нэрээ татсан байна.
ОХУ-ын теннисчдээс энэ тэмцээнд өмнө нь зөвхөн Мария Шарапова 2004 онд түрүүлж байжээ.