Ачаалж байна…
Ачаалж байна…
Монцамэ

Улаанбаатар, 2026 оны зургаадугаар сарын 12 /МОНЦАМЭ/. Netflix-ийн алдарт “Physical: Asia” шоуны олон улсын тамирчид "Уян" Монголын уран нугаралтын чуулга уулзалтын хүндэт зочдоор оролцоно. Тус олон улсын чуулганыг энэ сарын 19-21-нд Тэрэлжийн байгалийн цогцолборт газарт зохион байгуулах юм.
Монголын өв соёл, орчин үеийн тайзны урлаг болон дэлхийн хэмжээний уран бүтээлчдийг нэг тайзан дээр нэгтгэх “Монголын уран нугаралтын чуулга уулзалт 2026”-гийн ерөнхий зохион байгуулагчаар ажиллаж буй МУГЖ Э.Лхагва-Очирын мэдээлснээр, “Physical: Asia” шоуны Австрали улсын багийн оролцогч Доминик Ди Томмасо, Филиппин улсын багийн ахлагч Жастин Ковени, оролцогч Марк Мүгэн болон тус шоуны финалд шалгарсан Монголын багийн оролцогчид энэхүү үйл ажиллагаанд нэгдэж, уран нугаралт, биеийн тэнцвэрийн урлагийг сурталчлан таниулахад оролцох ажээ.

Олон улсын тамирчид, уран бүтээлчдийн оролцоо нь уран нугараачдын чуулга уулзалтын цар хүрээг зөвхөн цирк, уран нугаралтын салбараар хязгаарлахгүйгээр фитнесс, хөдөлгөөний урлаг, контемпорари үзүүлбэр, олон улсын спорт энтертайнментын салбарын үзэгчдэд хүргэхэд онцгой ач холбогдолтой юм.
Монголын уран нугаралтын чуулга уулзалтыг АНУ-ын Лас Вегас хотноо ажиллаж амьдардаг, МУГЖ Ж.Эрдэнэчимэг үүсгэн байгуулсан бөгөөд өмнө нь АНУ-д хоёр удаа, Улаанбаатар хотод нэг удаа зохион байгуулж байжээ. Харин олон улсын чуулганы өнөө жилийн онцлог нь уран нугаралт хэмээх Монголын өвөрмөц өв соёлыг Монголын бусад урлагтай хослуулсан үзүүлбэр тоглолтуудыг шигтгэн багтааж Монгол Улсаа дахин шинээр таниулах бас нэгэн боломжийг эрхэмлэж буйд оршиж буй ажээ.
Уг үйл ажиллагааны дэлгэрэнгүй хөтөлбөрийг https://montsame.mn/mn/read/401737 -ээс үзнэ үү.