Ачаалж байна…
Ачаалж байна…
Дэлгэрцэцэг Дээгий

Даланзадгад, 2026 оны арваннэгдүгээр сарын 19 /МОНЦАМЭ/. Өмнөговь аймгийн Говь Гурвансайханы байгалийн цогцолборт газрын байгаль хамгаалагч Батаагийн Мөнхжаргал Монгол Улсын Ерөнхийлөгчийн зарлигаар төрийн дээд шагнал “Алтан гадас” одон хүртлээ.
Тэрбээр Говь Гурвансайханы байгалийн цогцолборт газрын Гурвантэс сум дахь Хэрмэн цав, Зуун мод, Зулганай зэрэг байгалийн өвөрмөц тогтоц, түүх, соёл, палеонтологийн үнэт өв бүхий газар нутгийг 2013 оноос хойш хариуцан хамгаалж, эх байгалиа хайрлан хамгаалах үйлсэд үр бүтээлтэй ажиллаж байгаа юм.
Б.Мөнхжаргал нь хариуцсан нутаг дэвсгэртээ говь, цөлийн экосистемийн унаган төрхийг хадгалах, ховор болон нэн ховор амьтан, ургамлыг хамгаалах, байгалийн нөөц баялгийг зохистой ашиглуулах, хууль бус үйл ажиллагаанаас урьдчилан сэргийлэх чиглэлээр ажилладаг. Түүний хамгаалалтад Хэрмэн цав, Нэмэгтийн их хонгил зэрэг дэлхийд ховор палеонтологийн олдвор бүхий газар нутаг багтдаг байна.
Тухайлбал, Хэрмэн цав нь олон сая жилийн геологийн хувьслын үр дүнд бий болсон өвөрмөц тогтоцтой бөгөөд 70-120 сая жилийн өмнөх үлэг гүрвэлийн олдвороороо дэлхийд танигдсан байгалийн болон палеонтологийн онцгой өв юм.
Говь Гурвансайханы байгалийн цогцолборт газрын хамгаалалтын захиргаа нь 1996 онд бие даасан бүтэцтэйгээр байгуулсан бөгөөд энэ онд түүхт 30 жилийн ой нь тохиож байна.
Тус ойн босгон дээр байгаль хамгаалах үйлсэд олон жил үр бүтээлтэй ажиллаж, говь нутгийн байгалийн өвийг хамгаалахад үнэтэй хувь нэмэр оруулсан Б.Мөнхжаргал төрийн дээд шагнал хүртсэн нь түүний хөдөлмөр, зүтгэлийг үнэлсэн хүндэтгэл боллоо.
Шагналыг Өмнөговь аймгийн ИТХ-ын дарга О.Эрдэнэ-Өрнөх гардуулан өгч, байгаль орчныг хамгаалах үйлсэд оруулсан хувь нэмэр, олон жилийн хөдөлмөр зүтгэлд нь баяр хүргэж, цаашдын ажилд нь амжилт хүслээ.