Ачаалж байна…
Ачаалж байна…
Montsame News Agency

Өлгий, 2026 оны арваннэгдүгээр сарын 12 /МОНЦАМЭ/. Баян-Өлгий аймгийн Гэмт хэргээс урьдчилан сэргийлэх ажлыг зохицуулах салбар зөвлөлийн өргөтгөсөн хуралдаан болж, орон нутагт хэрэгжүүлсэн урьдчилан сэргийлэх ажлын үр дүн, тулгамдаж буй асуудал болон цаашдын зорилтын талаар хэлэлцлээ.
Хуралдаанд аймгийн ИТХ-ын дарга бөгөөд салбар зөвлөлийн дарга А.Бегарыс, Монгол Улсын Гэмт хэргээс урьдчилан сэргийлэх ажлыг зохицуулах зөвлөлийн Ажлын албаны дарга Ж.Буянбат, чиглэлийн ахлах шинжээч Б.Намсрай, салбар зөвлөлийн гишүүд, холбогдох байгууллагын удирдлага, мэргэжилтнүүд оролцов.
Энэ удаагийн хуралдаан нь салбар зөвлөлийн үйл ажиллагаанд хяналт-шинжилгээ хийх, мэргэжил, арга зүйн дэмжлэг үзүүлэх зорилготой байв. Энэ хүрээнд орон нутагт хэрэгжүүлсэн урьдчилан сэргийлэх ажил, байгууллагуудын хамтын ажиллагаа, төсөв, санхүүжилтийн зарцуулалт, тулгамдаж буй асуудлыг авч хэлэлцсэн юм.
Тухайлбал, цахим залилангаас сэргийлэх сургалт, нөлөөллийн ажлын хэрэгжилт, олон нийтийн цагдаагийн оролцоо, хяналтын камерын хяналт, зам тээврийн болон усны ослоос урьдчилан сэргийлэх, байгаль хамгаалах чиглэлээр хийж хэрэгжүүлсэн ажлаа танилцуулж, үр дүнг хэлэлцэв.
Гэмт хэргээс урьдчилан сэргийлэх ажлыг зохицуулах зөвлөлийн Ажлын албаны дарга Ж.Буянбат урьдчилан сэргийлэх бодлогын хэрэгжилт, салбар зөвлөлүүдийн чиг үүрэг, 2027-2030 оны стратеги төлөвлөгөөний үндсэн зорилт, чиглэлийн талаар мэдээлэл өглөө.
Тэрбээр гэмт хэргийн шалтгаан, нөхцөл, эрсдэлийг нарийвчлан судалж, түүнд үндэслэн урьдчилан сэргийлэх арга хэмжээг төлөвлөх шаардлагатайг онцлов. Түүнчлэн боловсрол, эрүүл мэнд, хөдөлмөр, нийгмийн хамгаалал, хууль сахиулах байгууллагуудын уялдаа холбоог бэхжүүлж, хамтарсан ажлыг үр дүнтэй хэрэгжүүлэх нь чухал болохыг тэмдэглэлээ.
Мөн хүүхдийн эсрэг гэмт хэрэг, гэр бүлийн хүчирхийлэл, цахим залилангаас урьдчилан сэргийлэх, хохирогчдод үзүүлэх хамгааллын үйлчилгээний хүртээмжийг сайжруулах, энэ чиглэлд иргэдийн оролцоог нэмэгдүүлэх асуудлыг хөндөн санал солилцов.
Хуралдаанаар ирэх 2027 оны ажлын төлөвлөгөөг орон нутгийн онцлог, гэмт хэргийн нөхцөл байдал, эрсдэлд тулгуурлан боловсруулах, байгууллагуудын хамтын ажиллагааг өргөжүүлэх, урьдчилан сэргийлэх ажлын хэрэгжилт, үр дүнг сайжруулахад анхаарах чиглэлүүдийг тодорхойллоо.