Ulaanbaatar
Хулгайлах гэмт хэрэгтэй тэмцэх захирамж гарав
МОНГОЛЫН МЭДЭЭ | ХУУЛЬНийслэлийн Засаг даргын Санхүү, эдийн засгийн асуудал хариуцсан орлогч Н.Батаа “Хөршийн хяналт” хөтөлбөрийн хүрээнд гэмт хэрэг зөрчлөөс урьдчилан сэргийлэх А/77 дугаар захирамж гаргалаа. Захирамжаар “Хөршийн хяналт хөтөлбөр”-ийн хүрээнд хэрэгжих “Хулгайлах гэмт хэрэгтэй тэмцэх, урьдчилан сэргийлэх дэд хөтөлбөр”-ийг баталсан байна.
Захирамжаар гэмт хэрэг, зөрчлөөс урьдчилан сэргийлэх ажилд иргэн болон байгууллага,аж ахуйн нэгжийг татан оролцуулж хамтран ажиллан үр дүнг тооцох, биелэлтийг Улаанбаатар хотын Цагдаагийн газарт, хагас, бүтэн жилээр тайлагнахыг дүүргийн Засаг дарга нарт, “Хөршийн хяналт хөтөлбөр”-ийг хэрэгжүүлэх ажлын хүрээнд хулгайн гэмт хэргийг бууруулах, урьдчилан сэргийлэх зорилгоор хариуцсан нутаг дэвсгэртээ үйл ажиллагаа явуулж байгаа байгууллага,аж ахуйн нэгжүүдэд орчиндоо гэрэлтүүлэг, стандартын шаардлага хангасан камер байршуулж аюулгүй орчныг бүрдүүлэх талаар холбогдох шийдвэр гаргаж ажиллахыг дүүргийн Засаг дарга нарт, Нийтийн эзэмшилийн орон сууц, авто зогсоол, гэр хорооллын гудамж талбайг камержуулах ажлыг үе шаттай зохион байгуулахыг Улаанбаатар хотын Цагдаагийн газар, нийслэлийн Мэдээллийн технологийн газар, дүүргийн Засаг дарга нарт үүрэг болголоо. Нийслэл хотод үйлдэгдсэн гэмт хэргийн шалтгаан нөхцлийг судлах, түүнийг таслан зогсоох, бууруулах арга зам, хэлбэрийг тодорхойлох зорилтод криминологи судалгааны ажлыг хөндлөнгийн байгууллагуудаар хийлгэж зохион байгуулалтын арга хэмжээ авахыг Улаанбаатар хотын Цагдаагийн газарт даалгасан байна.
Ж.Батсайхан
Связанные новости
