Ulaanbaatar
М.Анхцэцэг лхагва гарагт ДАШТ-ий дэвжээнд хүчээ сорино
МОНГОЛЫН МЭДЭЭ | СПОРТ
Улаанбаатар /МОНЦАМЭ/. Тайландын Паттаяа хотноо хүндийг өргөлтийн 2019 оны дэлхийн аварга шалгаруулах тэмцээнд оролцож буй манай тамирчдаас хуваарийн дагуу Э.Билэгсайхан маргааш /IX.24/, дэлхийн аваргын хүрэл медальт М.Анхцэцэг лхагва гарагт /IX.25/ хүчээ сорино.
Энэ удаагийн ДАШТ-д манай улсаас дасгалжуулагч Ц.Хосбаярын удирдлага дор таван тамирчин оролцож байгаа бөгөөд манай туйванчдаас гурван тамирчин тэмцээнээ өндөрлүүлжээ. Тухайлбал, эмэгтэйчүүдийн 55 кг-ын жинд Ч.Нямзул, эрэгтэй 67 кг-д Э.Мөнхдөл, 64 кг-д Оюутны ДАШТ-ий мөнгө, өсвөрийн Ази тивийн АШТ-ий мөнгөн медальт Г.Анужин нар тэмцээнээ дуусгажээ.
Эмэгтэйчүүдийн 64 кг-д 42 тамирчин өрсөлдсөнөөс "Рио"-гийн
олимпын аварга, ДАШТ-ий дөрвөн удаагийн алтан медальт, Хятадын Дэн Вей нийлбэр
261 кг-ыг өргөж, дэлхийн аваргын тав дахь алтан медалиа хүртжээ. Энэ жинд Г.Анужин
нийлбэр дүнгээр 190 кг-ыг өргөж 31 дүгээр байр эзэлжээ. Тэрбээр огцом
өргөлтөөр 87 кг, түлхэлттэй өргөлтөөр 103 кг тус тус өргөсөн байна.
