Ulaanbaatar
Канадад “Moderna”-гийн вакциныг өсвөр насныханд хэрэглэхийг зөвшөөрчээ
ДЭЛХИЙН МЭДЭЭ | ЭРҮҮЛ МЭНД
ОТТАВА. /CBC/. Канадын Эрүүл мэндийн яам “Moderna” компанийн “COVID-19”-ийн вакциныг өсвөр насны хүүхдүүдэд хэрэглэхийг
зөвшөөрч буйгаа баасан гарагт мэдэгдэв.
“Энэхүү вакцины талаарх мэдээлэлд нарийвчилсан, бие
даасан шинжлэх ухааны судалгаа хийсний дүнд 12-17 насны хүүхдүүдийг халдвараас
урьдчилан сэргийлэхэд аюулгүй, үр дүнтэй хэмээн дүгнэлээ” гэж Эрүүл мэндийн
яам, Нийгмийн эрүүл мэндийн газраас мэдэгджээ.
Канад “Pfizer-BioNTech”-ийн вакцинд тавдугаар сарын эхээр 12-15 насны
хүүхдүүдэд хэрэглэх зөвшөөрөл олгосон юм. Уг вакциныг 2020 оны 12 дугаар сард
16 болон түүнээс дээш насныханд хэрэглэхийг зөвшөөрсөн бөгөөд тухайн сардаа “Moderna”-гийн вакцинд 18-аас дээш насныханд тарих зөвшөөрөл
олгосон билээ.
“Moderna” компани өсвөр насны
3700 хүүхдийг хамруулсан эмнэлзүйн туршилтынхаа үр дүнд тулгуурлан вакцинаа
12-17 насны хүүхдүүдэд хэрэглэх зөвшөөрөх хүсэлтийг зургаадугаар сарын эхээр
Канадын холбогдох байгууллагуудад гаргажээ. Энэхүү туршилтад оролцсон
хүүхдүүдийн дунд халдварын нэг ч тохиолдол илрээгүй юм.
“Pfizer”-ийн вакциныг өсвөр
насны хүүхдүүдэд хэрэглэхийг зөвшөөрөх шийдвэрийг хэдхэн долоо хоногийн дотор
гаргасан Канадын Эрүүл мэндийн яам “Moderna”-гийн вакцинд зөвшөөрөл олгохдоо яагаад хоёр сар гаруйн
турш судалгаа хийснээ тайлбарлаагүй байна.
Европ “Moderna”-гийн
вакцинд өсвөр насныхныг хамруулах зөвшөөрлийг сар гаруйн өмнө олгосон бол АНУ
ийм зөвшөөрлийг хараахан олгоогүй байгаа юм.
