Ulaanbaatar
Ази тивийн АШТ-д амжилттай оролцсон боксчдод хүндэтгэл илэрхийлэв
МОНГОЛЫН МЭДЭЭ | СПОРТ
Улаанбаатар /МОНЦАМЭ/. Биеийн тамир, спортын улсын хорооны дарга Ц.Шаравжамц өнөөдөр БТСУХ-ны хүндэтгэлийн танхимд Узбекистаны нийслэл Ташкент хотод болсон боксын U22 Ази тивийн АШТ-д бахдам амжилт гаргасан багт хүндэтгэл илэрхийллээ.
Ёслолд багийн ахлагч М.Баянмөнх, дасгалжуулагч
Б.Пүрэв-Очир, М.Буянжаргал, С.Эрдэнэбат нараас гадна тэмцээнд өндөр амжилт
байгуулж, 2 алт, 2 мөнгө, 8 хүрэл медаль хүртсэн тамирчид хүрэлцэн ирлээ.
Тэмцээнд 12 орны 109 тамирчин өрсөлдсөн бөгөөд манай
улсаас эмэгтэйчүүдийн 54 кг-ын жинд М.Энхжаргал, 60 кг-д Г.Бадмаараг нар алтан
медаль хүртэж, 57 кг-д М.Намуун, 63 кг-д М.Цэцэгдарь нар мөнгөн медаль хүртсэн
бол 48 кг-д Б.Жанаргуль, 50 кг-д А.Хулан, эрэгтэйчүүдийн 51 кг-д Х.Азбаяр, 54
кг-д Д.Ганболд, 60 кг-д Б.Буяндалай, 63.5 кг-д Б.Төгөлдөр, 67 кг-д А.Жандос,
75 кг-д Б.Гантулга нар хүрэл медаль хүртсэн билээ.
Уулзалтын үеэр БТСУХ-ны дарга Ц.Шаравжамц баг, тамирчдад өндөр амжилт хүсэж, тамирчдын бэлтгэлийн төв байгуулах тухай баярт мэдээг дуулгасан юм.
