Ulaanbaatar
Дорнодын нутгаар цасан шуурга шуурна
МОНГОЛЫН МЭДЭЭ | БАЙГАЛЬ ОРЧИН
Улаанбаатар /МОНЦАМЭ/. Дорнодын нутгаар маргааш өдөр цасан шуурга шуурна.
Өнөө шөнө төв болон зүүн аймгуудын нутгийн хойд хэсэг,
маргааш өдөр зүүн аймгуудын нутгаар, цаашдаа нутгийн хойд хэсгээр цас хайлмагтан
орж, цасан шуурга шуурч, нутгийн өмнөд хэсгээр хүчтэй салхи, шороон шуургатай
байхыг онцгойлон анхаарууллаа.
2022 оны 3 дугаар сарын 13-17-ныг хүртэлх цаг агаарын
урьдчилсан төлөв танилцуулж байна.
Энэ сарын 13-нд баруун болон төвийн аймгуудын ихэнх нутаг, говийн
аймгуудын нутгийн хойд хэсэг, 14, 16-нд төв болон зүүн аймгуудын нутгийн зарим
газраар, 15-нд баруун аймгуудын нутгийн хойд хэсэг, төв болон зүүн аймгуудын
нутгийн зарим газраар нойтон цас, цас орж, цасан шуурга шуурна. Салхи ихэнх
хугацаанд секундэд 7-12 метр, зарим газраар түр зуур секундэд 16-18 метр хүрч
ширүүсэж, шороон шуурга шуурна. Увс нуур болон Дархадын хотгор, Тэс голын
хөндийгөөр шөнөдөө 23-28 градус, өдөртөө 12-17 градус, Дархадын хотгор болон
Алтай, Хангай, Хөвсгөл, Хэнтийн уулархаг нутаг, Хүрэнбэлчир орчим, Эг, Үүр,
Сэлэнгэ, Хараа, Ерөө, Туул, Тэрэлж, Хэрлэн, Онон, Улз, Халх голын хөндийгөөр
шөнөдөө 18-23 градус, өдөртөө 6-11 градус, цас багатай газар болон говийн бүс
нутгийн өмнөд хэсгээр шөнөдөө 2-7 градус хүйтэн, өдөртөө 8-13 градус дулаан,
бусад нутгаар шөнөдөө 11-16 градус, өдөртөө 1-6 градус хүйтэн байна.
