Ulaanbaatar
Анагаах ухаан, биотехнологийн судалгааны чиглэлээр Куба улстай хамтран ажиллана
МОНГОЛЫН МЭДЭЭ | ЭРҮҮЛ МЭНД
Улаанбаатар /МОНЦАМЭ/. Эрүүл мэндийн сайд С.Энхболд Бүгд Найрамдах Куба Улсаас Монгол Улсад суугаа Онц бөгөөд Бүрэн эрхт Элчин сайд ноён Хорхе Феррер Родригесийг өнөөдөр хүлээн авч уулзлаа.
Элчин сайд ноён Хорхе Феррер Родригес Монгол-Кубын
харилцаанд эрүүл мэндийн салбар чухал байр суурь эзэлдэг уламжлалт салбар
болохыг онцлон тэмдэглээд Кубын анагаах ухаан, ялангуяа биотехнологийн дэвшлээс
Монгол Улсын эрүүл мэндийн салбарт нэвтрүүлэх, хуваалцах сонирхолтой байгаагаа
илэрхийлж, тодорхой асуудлаар санал дэвшүүлэв. Тэрбээр Куба Улсын Засгийн
газраас авч хэрэгжүүлж байгаа “КОВИД-19”-ийн эсрэг хариу арга хэмжээг
танилцуулж, түүнчлэн тус улсын биотехнологийн компаниудын хөгжүүлсэн
вакцинуудын талаар мэдээлэл өгөв.
Эрүүл мэндийн сайд С.Энхболд шинээр томилогдсон Элчин сайдад баяр хүргэж, ажлын өндөр амжилт хүсэхийн сацуу өнгөрсөн оны 4 дүгээр сард байгуулсан хоёр улсын Эрүүл мэндийн яамдын хамтын ажиллагааны санамж бичигт тусгасан чиглэлүүдээр хамтран ажиллаж, бодит үр дүнд хүрэх эрмэлзэлтэй байгаагаа дахин нотлов.
Санамж бичгийн хүрээнд хоёр улсын Эрүүл мэндийн яам халдварт болон халдварт бус өвчний хяналт, урьдчилан сэргийлэлт, анагаах ухаан, эм зүй, биотехнологийн судалгаа, эрүүл мэндийн анхан шатны тусламж үйлчилгээ зэрэг чиглэлээр хамтран ажиллахаар тохиролцсон юм.
Уулзалтын үеэр Эрүүл мэндийн сайд С.Энхболд “КОВИД-19” цар
тахлын дотоодын нөхцөл байдал хийгээд цар тахалтай тэмцэх чиглэлээр Монгол
Улсын Засгийн газраас авч хэрэгжүүлсэн арга хэмжээнүүд, нэн ялангуяа
вакцинжуулалтын хамрагдалт, үр дүнгийн талаар танилцуулж, улмаар Эрүүл мэндийн
яамд хоорондын анхны Зөвлөлдөх уулзалтыг энэ ондоо багтааж зохион байгуулах
хүсэлтэй байгаагаа илэрхийллээ.
