Польш Улстай харилцаа, хамтын ажиллагаагаа бэхжүүлэх талаар санал солилцов
МОНГОЛЫН МЭДЭЭ | УЛС ТӨР
Улаанбаатар, 2025 оны дөрөвдүгээр сарын 16 /МОНЦАМЭ/. УИХ-ын Аж үйлдвэржилтийн бодлогын байнгын хорооны дарга С.Ганбаатар өнөөдөр Бүгд Найрамдах Польш Улсаас Монгол Улсад суугаа Онц бөгөөд Бүрэн эрхт Элчин сайд Кшиштоф Бойкотой уулзаж, хоёр улс дипломат харилцаа тогтоосны 75 жилийн ойн хүрээнд харилцаа, хамтын ажиллагааны түвшнийг ахиулж, иж бүрэн түншлэлд хүргэснийг бэхжүүлэх, үүний хүрээнд нийгэм, эдийн засгийн хөгжлийн зорилтуудыг уялдуулах талаар санал солилцов.
Байнгын хорооны дарга С.Ганбаатар Монгол Улсын Засгийн газрын үйл ажиллагааны хөтөлбөрт тусгасан 14 мега төслийг танилцуулж, эдгээрийг хэрэгжүүлэхэд өндөр технологи бүхий дэлхийн томоохон үйлдвэрүүд, паркуудын инновац, технологийн сайн туршлагаас суралцах, нутагшуулах явдал чухал болохыг онцлон, үүнд Аж үйлдвэржилтийн бодлогын байнгын хороо бодлогын дэмжлэг үзүүлэх чиг үүрэгтэйг дурдлаа. Тэрбээр Польшийн KGHM корпорацийн зэс хайлуулах цэвэршүүлэх үйлдвэрүүдийг жишээлж, хоёр улсын эдийн засаг, үйлдвэрлэл технологийн талаарх хамтын ажиллагааг эрчимжүүлэх, өрхийн, бичил, жижиг, дунд үйлдвэрлэлийг хөгжүүлсэн тус улсын туршлагыг судлах, хүнс, хөдөө аж ахуй, хөнгөн үйлдвэрийн чиглэлээрх харилцаа, түншлэлийг өргөжүүлэх, эдгээр асуудлаарх эрх зүйн орчныг боловсронгуй болгоход мэдээлэл, зөвлөмж солилцож хамтран ажиллах санал дэвшүүлэв.
Элчин сайд Кшиштоф Бойко хоёр улсын ард түмнүүдийн харилцан хүндлэл, итгэлцлийг бэхжүүлэх, хамтын ажиллагааг бүх талаар гүнзгийрүүлэн хөгжүүлэх нь иж бүрэн түншлэлийн зорилго болохыг тэмдэглэн, аж үйлдвэрлэл, тэр дундаа уул уурхайн боловсруулах үйлдвэрлэлийн туршлага, хууль, эрх зүйн орчин, технологийн талаар хамтран ажиллах боломж бүрэн бий гэлээ. Уулзалтад УИХ-ын гишүүн Б.Уянга, Ж.Золжаргал нар байлцлаа гэж УИХ-ын Хэвлэл мэдээллийн газраас мэдээлэв.