Ulaanbaatar
Туркийн Төв банк бодлогын хүүгээ 46 хувьд хүргэжээ
ДЭЛХИЙН МЭДЭЭ | ЭДИЙН ЗАСАГ
АНКАРА, 2025 оны дөрөвдүгээр сарын 18 /Kazinform/. Туркийн Төв банк бодлогын хүүгээ 42.5 хувиас 46 хувьд хүргэж өсгөжээ. Ийнхүү шийдвэрлэсэн нь инфляцыг хязгаарлах, үндэсний валют болох турк лирийн ханшийг тогтворжуулахад чиглэсэн мөнгөний бодлого үргэлжилж байгаатай холбоотой. Лирийн ханш саяхан хамгийн доод түвшинд хүртлээ унасан юм.
Тус улсад инфляцын дарамт нэмэгдэж байгаа үед бодлогын хүүг өсгөхөөр шийдвэрлэжээ. Туркийн жилийн инфляц хоёр оронтой тоонд хэвээр байгаа нь хүн амын амьжиргааны өртөг, худалдан авах чадварт нөлөөлсөөр байна.
Инфляц буурах шинж тэмдэг ажиглагдах хүртэл мөнгөний хатуу бодлогыг үргэлжлүүлэн хэрэгжүүлнэ гэж Туркийн Төв банкны мэдэгдэлд дурджээ.
Бодлогын хүүг ийнхүү огцом нэмэгдүүлсэн нь иргэд, бизнес эрхлэгчдийн хувьд зээл авах боломж хязгаарлагдаж, хэрэглээний эрэлт буурахад хүргэж болзошгүй хэдий ч лирийн ханшид итгэх итгэлийг сэргээх, макро эдийн засгийн үзүүлэлтүүдийг тогтворжуулахын тулд зайлшгүй авах шаардлагатай арга хэмжээ мөн гэж шинжээчид үзэж байна.
Туркийн Төв банкны одоогийн удирдлага 2023 онд эдийн засгийн тэргүүлэх чиглэлүүд өөрчлөгдснөөс хойш инфляцтай тэмцэх уламжлалт арга барил руу эргэн шилжжээ. Өмнө нь бодлогын хүүг зориудаар хэт доогуур түвшинд барьж байсан нь эдийн засгийн хямралыг улам гүнзгийрүүлсэн гэж шинжээчид дүгнэсэн байна.
Өмнө нь гуравдугаар сард Туркийн Төв банк бодлогын хүүгээ 45 хувиас 42.5 хувь болгож бууруулсан юм.
