Ulaanbaatar
Д.Трамп Сирийн шинэ удирдагчтай уулзжээ
ДЭЛХИЙН МЭДЭЭ | УЛС ТӨР
ВАШИНГТОН, 2025 оны арваннэгдүгээр сарын 11 /DW/. Сирийн Ерөнхийлөгч Ахмед аль-Шараа Цагаан ордонд АНУ-ын Ерөнхийлөгч Дональд Трамптай даваа гарагт уулзсан нь босогчоос удирдагч болсон 42 настай түүний хувьд онцгой үйл явдал байлаа.
Жил орчмын өмнө А.Шараа 14 жил үргэлжилсэн иргэний дайны
дараа Башар Асадыг түлхэн унагахаар Сирийн баруун хойд нутгийн лалын шашинтнууд оролцсон дайралтыг удирдсан юм. Тэрбээр
Цагаан ордонд айлчилсан Сирийн анхны төрийн тэргүүн болж байна.
Д.Трамп, А.Шараа нар юу хэлэлцсэн бэ?
А.Шараа АНУ-ын хориг арга хэмжээнүүдийг бүрмөсөн цуцлахыг
зорьж байсан боловч Д.Трамптай хийсэн түүний хаалттай уулзалтын дараа Сангийн
яам хориг арга хэмжээнүүдийг түдгэлзүүлэх хугацааг 180 хоногоор сунгасан гэж
мэдэгджээ. Одоо зөвхөн Конгресс тэдгээрийг бүрмөсөн цуцлах боломжтой юм.
Уулзалтын дараа Д.Трамп Сирийн удирдагчийг “хатуу чанга залуу” хэмээн тодорхойлсны зэрэгцээ “тэрбээр
надад таалагддаг” хэмээн хэлжээ. “Сири улсыг зорилгод нь хүргэхийн тулд бид
чадах бүхнээ хийх болно, учир нь энэ бол Ойрх Дорнодын нэг хэсэг юм” гэж
тэрбээр нэмж хэлсэн байна.
Хоёр орны удирдагчид зургаан сарын өмнө Саудын Арабын
нийслэл Эр-Рияд хотноо болсон Булангийн аюулгүй байдлын асуудлаарх дээд
хэмжээний уулзалтын үеэр анх удаа уулзсан юм. АНУ-ын тал Сири, Израилын хооронд
аюулгүй байдлын гэрээ байгуулахад зуучилж, Дамаскийн агаарын баазад цөөн тооны
цэргийн хүч байрлуулахаар төлөвлөж байгаа гэж дипломат эх сурвалжууд мэдээлжээ.
Сирийн эсрэг авсан АНУ-ын ихэнх хориг арга хэмжээг саяхан цуцалсан Д.Трамп уулзалтын өмнө “Сиритэй холбоотой асуудлуудаар томоохон ахиц дэвшил гарсан” хэмээн хэлээд, А.Шарааг “хэцүү хөршийн хатуу чанга залуу” гэж сайшаасан байна.
Одоо Сирид юу болж байна вэ?
Б.Асадыг унагаснаас хойш 2500 гаруй хүний аминд хүрсэн шашны үймээн самуунтай тулгарч буй А.Шараагийн засгийн газар хяналтаа бэхжүүлсээр байна. А.Шарааг хөнөөхийг завдсан “Лалын улс” бүлэглэлийн хоёр хуйвалдааныг сүүлийн саруудад таслан зогсоосон бөгөөд энэ нь тус бүлэглэлийн эсрэг улс орон даяар эрс арга хэмжээ авахад хүргэжээ.
