Ulaanbaatar
Нийтийн тээврийн үйлчилгээ эрхлэгч аж ахуйн нэгжүүдийг шалгаж байна
МОНГОЛЫН МЭДЭЭ | НИЙГЭМ
Улаанбаатар /МОНЦАМЭ/. Нийслэлийн тээврийн үйлчилгээ эрхлэгч аж ахуйн нэгжүүдийн аюулгүй байдлыг шалгах мэргэжлийн байгууллагуудын хамтарсан шалгалт үргэлжилж байна.
Улаанбаатар хотын ерөнхий менежерийн шийдвэрээр Улаанбаатар хотын захирагчийн ажлын албаны Аудит, дотоод хяналтын хэлтсийн даргаар ахлуулсан нийслэлийн Тээврийн газар, нийслэлийн Онцгой байдлын газар, Замын цагдаагийн алба, Мэргэжлийн хяналтын газар, Нийгмийн даатгалын газар, нийслэлийн Дотоод аудитын газар, Том оврын автбусаар үйлчилгээ эрхлэгчдийн холбоо, Монголын тээвэр, холбоо, газрын тосны ажилтны үйлдвэрчний эвлэлүүдийн нэгдсэн холбооноос томилогдсон ажлын хэсэг уг шалгалтын ажлыг гүйцэтгэж байна. Хяналт шалгалт 2018 оны дөрөвдүгээр сарын 22 хүртэл үргэлжлэх юм.
Нийслэлийн тээврийн үйлчилгээ эрхлэгч аж ахуйн нэгж 21 байгууллага шалгалтад хамрахаас өнөөдрийн байдлаар 10 байгууллагаас 52 зөрчил илэрч, 6 зөрчлийг газар дээр нь арилгуулав. Шалгалтын явцад галын аюулгүй байдлын тухай хууль тогтоомж, түүнтэй нийцүүлэн гаргасан норм дүрэм, стандартыг зөрчсөн нийтлэг байсан бөгөөд холбогдох албан тушаалтнуудад мэргэжлийн заавар зөвлөгөө өгч ажиллаж байна.
Ч.Ариунболд
