Ulaanbaatar
Гурил үйлдвэрлэгчид дотоодын гурилын хэрэгцээг хангах боломжтой гэжээ
МОНГОЛЫН МЭДЭЭ | ЭДИЙН ЗАСАГ
Улаанбаатар, 2025 оны наймдугаар сарын 29 /МОНЦАМЭ/. Манай улсын гурил үйлдвэрлэгчид дотоодын гурилын хэрэгцээгээ хангах боломжтойг ХХААХҮ-ийн сайд Ж.Энхбаяртай уулзах үеэрээ онцолжээ.
Зун хур
тунадас бага унаж,
хэт их халуун олон хоног
үргэлжилснээс ургац алдаж, заримаар
нь ногоон тэжээл бэлтгэх
болоод байгаа тул тэрбээр гурил үйлдвэрлэгч “Улаанбаатар гурил” ХХК, “Алтан
тариа” ХХК, ”Өег гурил” ХХК, “Од групп” ХХК, “Өгөөж гурил” ХХК, “Хөвсгөл алтан
дуулга” ХХК, “Милл хаус” ХХК-ийн төлөөлөлтэй уулзаж, санал солилцсон юм.
ХХААХҮЯ намрын
ургац хураалтаас 255.8 мянган тонн улаанбуудай хураан авах төлөвлөгөө гаргажээ. Энэ нь ирэх
хаврын тариалалтад 38.6 мянга, үрийн нөөцөд 12.5 мянга, тэжээлд 24.8 мянга,
спиртийн үйлдвэрлэлд 11 мянга, гурил үйлдвэрлэлд 168.9 мянган тонн улаанбуудай
шаардлагатай гэсэн үг.
Иймд 100 мянга тонн импортын улаанбуудай дутахаар байгаа аж.
Тариаланчид хэдий
байгалийн давагдашгүй хүчин зүйлтэй нүүр тулсан ч чадах бүхнээ хийж, хүнд үеийг давж байгааг
сайд Ж.Энхбаяр тодотгоод, “Дотоодын улаанбуудайгаар гурилын хэрэгцээг хангах,
тогтвортой байдалд анхаарах ёстой. Гаалийн албан татвараас чөлөөлөх тухай
хуулийг хүчингүй болгосон тул дагаж гарсан тогтоолоор алс баруун бүс нутгийн
иргэдэд гурилын үнэ тогтвортой байх зохицуулалтыг
хамтдаа хийх шаардлагатай байна” гэв.
“Хөдөө аж
ахуйн корпораци” ТӨХХК-ийн мэргэжилтэн
Н.Баттөмөр дэлхийн улаанбуудайн 25
хувийг хангадаг ОХУ-ын зах
зээлийн тухай мэдээлэхдээ, “ОХУ-ын Краснадорын 9, Ростов мужийн 4, Омск
мужийн 5 бүс гангийн улмаас ургацынхаа
25-35 хувийн алдах төлөвтэй. Газар тариалангийн
экспортынх нь хэмжээ жил бүр багасаж, га-гаас 50-60 центр
ургац авдаг газрууд гангийн улмаас 25-29
центр авахаар байна. Ургацын дундаж хэмжээ
багасаж, газар тариалан
эрхлэгч аж ахуйн нэгжүүд үйл ажиллагаагаа зогсоож байгаа тул улаанбуудайн
дэлхийн зах зээлийн үнэ өсөх хандлагатай”-г хэлж байлаа.
“Өег гурил” ХХК-ийн захирал А.Батсуурь, “ОХУ-ын Красноярс хотоос 2024 оны
III зэргийн улаанбуудай нэг тонныг нь 1 сая 250 мянган төгрөгөөр импортолж
байгаа. Чанар сайнгүй, гологдол их тул
ялгаж сортолж байна. Дотоодын шинэ ургацын улаанбуудайн дээжийг шинжлэхэд
гангаас үүдэн буудайн үр
жижгэрсэн” хэмээсэн бол “Улаанбаатар гурил” компанийн төлөөлөл ирэх сарын тавнаас дотоодын улаанбуудайн эхний ургацыг авч, үйлдвэрт буусны дараа чанарыг нь тодорхойлно гэжээ.
