Ulaanbaatar
Спрайт супер лигийн аваргын төлөөх тоглолтууд боллоо
МОНГОЛЫН МЭДЭЭ | СПОРТ
Улаанбаатар /МОНЦАМЭ/. Монголын Үндэсний сагсан бөмбөгийн холбоо /MBA/, MCS Coca cola, "TLG 13" ТББ-аас хамтран зохион байгуулдаг сонирхогчдын хамгийн том лиг Спрайт супер лигийн аваргын төлөөх тоглолтууд амралтын өдрүүдэд боллоо.
"Спрайт супер лиг"-ийн энэ улиралд сайн тоглож Баруун бүсийг хожлоор тэргүүлсэн С.Давааням дасгалжуулагчтай "Ховд Алтайн Барс" баг, мөн Зүүн бүсийн тэргүүн байраар хасагдах шатанд шалгарсан А.Энхбаатар эзэнтэй Б.Дожоодорж дасгалжуулагчтай "Хэнтий ЭБЭГ" багууд энэ улиралд аваргын төлөө шалгарчээ.
Финалын эхний тоглолт МҮЭСТО-ы спорт зааланд бямба гарагт болж "Хэнтий ЭБЭГ" баг 70:66-гаар эцсийн мөчид "Хэнтий ЭБЭГ" баг хожсон юм. Тус тоглолтод Г.Ган-Эрдэнэ 14 оноо, 6 самбар, 4 оновчтой дамжуулалт өгч багаа тэргүүлсэн юм. Харин цувралын хоёр дахь тоглолт эхний тоглолтын адилаар мөн л эцсийн мөчид шийдэгдлээ. Тоглолтын эхнээс л тэнцүүхэн өрсөлдөөнийг үзүүлсээр шийдвэрлэх дөрөвдүгээр үе тэнцүүхэн эхэлсэн юм.
Хожигдох эрхгүй талбайд гарсан "Алтайн Барс" багаас ээлж дараалсан холын шидэлтүүдийг амжилттай болгосноор тоглолтын шийдвэрлэх үед 10 орчим онооны давуутай болсон. Харин "Хэнтий ЭБЭГ" баг тийм ч амар бууж өгсөнгүй оноог ойртуулж чадсан ч 86:81-ээр хожигдол хүлээлээ.
"Алтайн Барс" багаас тоглолтын хоёрдугаар хагаст Б.Баярсүрэн гайхалтай байж 24 оноо, 6 самбар, 4 оновчтой дамжуулалт өгсөн байна. Мөн Г.Анар энэ тоглолтын турш сайн тоглосон юм. Энэхүү цуврал ийнхүү тэнцээгээр өндөрлөж нэмэлт тоглолт явагдахаар болов.
Д.Өлзий
