Ulaanbaatar
Боловсролын мастер төлөвлөгөө боловсруулах шаардлагатайг онцлов
МОНГОЛЫН МЭДЭЭ | БОЛОВСРОЛУлаанбаатар /МОНЦАМЭ/. БСШУСЯ, НҮБ-ын Хүүхдийн Сан, ЮНЕСКО-гийн Боловсролын төлөвлөлтийн олон улсын хүрээлэн зэрэг байгууллага хамтран Монгол Улсын боловсролын төлөвлөлтийн чадавхийг бэхжүүлэх сургалтыг энэ сарын 20-ны өдрөөс эхлэн 5 хоногийн хугацаатай зохион байгуулж, өчигдөр сургалтын хаалтын үйл ажиллагааг “Туушин” зочид буудалд хийлээ.
Хаалтын ажиллагаанд боловсролын салбарын хөгжлийн мастер
төлөвлөгөө боловсруулах ажлын хэсгийн гишүүд болох БСШУСЯ болон харьяа
байгууллагын удирдлага, мэргэжилтнүүд, их дээд сургуулийн төлөөлөл
оролцов.
Энэ үеэр БСШУСЯ-ны Олон улсын төсөл хөтөлбөр, гадаад хамтын
ажиллагааны газрын дарга доктор Т.Ууганбаяр хэлэхдээ, “Өнөө үед залуучуудын соёлын болон боловсролын хандлага
буруу тийш хазайх боллоо. Цахим орчин дахь элдэв хяналтгүй мэдээллээр тархиа угааж
байна. Энэ нь бидний өмнө боловсролын салбарын шинэ зууны мастер төлөвлөгөөг
боловсруулах зайлшгүй шаардлага байгаагийн нэг илрэл юм. Боловсролтой, зөв
хүмүүжилтэй иргэн улс орны ирээдүйг тодорхойлох учраас энэ сургалт маш чухал
юм” хэмээн онцолсон юм.
Сургалтын хугацаанд тэд бодлого төлөвлөлтийн үйл явц,
боловсролын чанар, өртөг зардал ба санхүүжилт, боловсролын салбарын удирдлагын
асуудлууд болон боловсролын симуляцийн загварууд зэрэг сэдвийн хүрээнд илтгэл
мэдээлэл хийж, хэлэлцүүлэг өрнүүлэв. Ингэхдээ оролцогчид багаар дадлага ажил
гүйцэтгэх хэлбэрээр сургалтыг зохион байгуулсан юм.
