Ulaanbaatar
Канадын батлан хамгаалахын зардлыг нэмэгдүүлнэ
ДЭЛХИЙН МЭДЭЭ | УЛС ТӨР
ОТТАВА, 2025 оны зургаадугаар сарын 10 /DW/. Канад улс энэ санхүүгийн жилд батлан хамгаалахын зардлыг дотоодын нийт бүтээгдэхүүний /ДНБ/ 2 хувьд хүргэх НАТО-гийн зорилтыг биелүүлнэ гэж Ерөнхий сайд Марк Карни даваа гарагт мэдэгджээ. Ингэснээр Либерал намынхны өмнө нь төлөвлөж байснаас таван жилийн өмнө уг зорилтыг биелүүлнэ гэдгийг тэрбээр дурдсан байна.
М.Карни Торонтогийн их сургуульд үг хэлэх үеэрээ, энэ жил Канад улс НАТО-гийн 2 хувийн зорилтыг төлөвлөсөн хугацаанаасаа таван жилийн өмнө биелүүлнэ гэдгийг би өнөөдөр
зарлаж байна гээд, одоо шуурхай, хүчтэй, шийдэмгий ажиллах
цаг болжээ хэмээн мэдэгджээ.
Батлан хамгаалахын зардлыг нэмэгдүүлснээр шинэ шумбагч онгоц, нисэх онгоц, хөлөг онгоц, хуягт машин, их буу, түүнчлэн далайн ёроол, Арктикийг хянах шинэ радар, нисгэгчгүй онгоц, мэдрэгч зэргийг худалдан авч, зэвсэгт хүчний алба хаагчдын цалинг нэмэгдүүлэх ажээ.
М.Карни
хэлэхдээ, дэлхий
“улам харанхуй” газар болж байгаа нь Канад улс аюулгүй
байдлын хувьд АНУ-аас хамааралтай байдлаа багасгах хэрэгтэй гэсэн үг юм гэжээ. Энэ оны гуравдугаар сард үүрэгт ажилдаа орсноосоо хойш М.Карни
Ерөнхийлөгч Дональд Трампын удирдлага дор дэлхий ертөнц дэх АНУ-ын манлайлал
өөрчлөгдөж буй талаар хэд хэдэн хатуу анхааруулга өгсөн байна.
М.Карни батлан хамгаалах зардлыг нэмэгдүүлэх тухай
мэдэгдлийг “НАТО-гийн мэргэжилтнүүдийн санаанд нийцүүлэхийн тулд бус, харин канадчуудыг хамгаалах зорилготой алхам" гэж тайлбарлажээ. Нийт 32 гишүүн орных нь 22 нь зардлын 2 хувийн зорилтод хүрсэн гэж НАТО дөрөвдүгээр сард мэдэгдсэн юм. Оросын цэргүүд 2022 онд Украин руу довтолсноос хойш Европын орнууд цэргийн төсвөө нэмэгдүүлсэн бөгөөд
НАТО зардлын доод шугамыг 2 хувь
байхаар тогтоожээ.
Канад мөн АНУ-аас аюулгүй байдлын хараат байдлаасаа ангижрахын тулд Европын Холбоотой /ЕХ/ харилцаагаа бэхжүүлэх талаар ЕХ-той хэлэлцэж байгаа ажээ. Тухайлбал, Европоос сөнөөгч онгоц зэрэг батлан хамгаалахын тоног төхөөрөмж худалдан авахад ихээхэн анхаарал хандуулж байна. М.Карнигийн Засгийн газар мөн АНУ-ын F-35 сөнөөгч онгоцыг худалдан авах асуудлыг хянаж, өөр сонголт байгаа эсэхийг судалж байгаа ажээ.
