Ulaanbaatar
Их мастер Э.Пүрэвжав цагт 2950 цифр тогтоон мөнгөн медаль хүртэв
МОНГОЛЫН МЭДЭЭ | СПОРТАНУ-ын Лас Вегас хотноо болж буй "Memoriad-2016" World Mental Olympics буюу оюуны олимпийн тэмцээнд манай тамирчдын амжилтын буухиа үргэлжилж байна.
Тэмцээний эхний өдрийн сүүлийн төрөл болох 1 цагийн "Тооны марафон" төрөлд 2015 оны өсвөрийн дэлхийн аварга, Олон улсын Их мастер Э.Пүрэвжав 1 цагт 2950 цифр тогтоон алдаагүй санаснаар оюуны олимпийн мөнгөн медалийн болзол хангалаа. Тэмцээний 3 цаг буюу хамгийн удаан үргэлжилдэг энэ төрөл анхаарал төвлөрөлт, тэсвэр тэвчээрийг дээд зэргээр шаарддаг аж.
Тус төрөлд АНУ-ын тамирчин Алекс Мюллин 3115 цифр тогтоон тэргүүн байр, Германы тамирчин Гённес Маллов 2276 цифр тогтоосноор 3 дугаар байрт шалгарчээ.
Одоогийн байдлаар манай тамирчид "Хурдны хөзөр" төрөлд хүрэл медаль, цээж бодолтын "Mental Multiplication" буюу 8 оронтой 2 тооны үржвэрийг олох төрөлд мөнгөн медаль хүртээд байна.
Гурван өдөр үргэлжлэх тус тэмцээнд 27 орны 167 тамирчин ой тогтоолт, цээж бодолт болон хурдан уншлагын 13 төрлөөр өрсөлдөж байгаа юм.
Ж.Болор
