Ulaanbaatar
Ардчилсан намын даргаар О.Цогтгэрэлийг сонголоо
МОНГОЛЫН МЭДЭЭ | УЛС ТӨР
Улаанбаатар, 2025 оны наймдугаар сарын 31 /МОНЦАМЭ/. Ардчилсан намын шинэ даргыг сонгох Үндэсний бодлогын хорооны хурал өнөөдөр болж УИХ-ын гишүүн, УИХ дахь Ардчилсан намын бүлгийн дарга О.Цогтгэрэл тодорлоо.
Тус намын даргыг сонгох сонгууль хоёр үе шаттай болсон юм. Үндэсний бодлогын хорооны 314 гишүүн санал өгөхөд эхний шатанд нэр дэвшигч О.Цогтгэрэл 196, Б.Пүрэвдорж 82, Ж.Баярмаа 33, Б.Отгонбат 3 санал авчээ. Улмаар эхний шатнаас Б.Отгонбат хасагдаж, гурван нэр дэвшигчийн дунд санал хураалтыг дахин явуулахаар болоход Б.Пүрэвдорж, Ж.Баярмаа нар нэрээ татсанаар О.Цогтгэрэлийг даргаар сонголоо. Үндэсний бодлогын хорооны ээлжит бус хуралдаанаас гарсан энэхүү шийдвэрийг намын Их хурлын гишүүдэд танилцуулан ёсчлох дэгтэй аж. Тэрбээр "Ардчилсан нам давхар, дараалж ялах амбицтай байх ёстой. АН-д олон баатар бий" хэмээн ярилаа.
Намын даргын сонгуульд ялалт
байгуулсан О.Цогтгэрэл “Тэсо” компанийн захирал, корпорацын ерөнхийлөгч,
Ерөнхий сайдын зөвлөх, Увс аймаг дахь АН-ын даргаар ажиллаж байсан бөгөөд УИХ-ын
гишүүнээр хоёр удаа сонгогдсон нэгэн юм. Тэрбээр 2022 оноос УИХ дахь АН-ын
бүлгийн даргаар ажиллаж байсан билээ.
