Ulaanbaatar
“MongolZ” дэлхийн чансааны дэд байрт дэвшлээ
МОНГОЛЫН МЭДЭЭ | СПОРТ
Улаанбаатар, 2025 оны есдүгээр сарын 10 /МОНЦАМЭ/. Цахим спортын “CS2” төрлийн мэргэжлийн багуудын чансааг тогтоодог хамгийн том платформ болох “HLTV”-гээс шинэчилсэн жагсаалтаа танилцуулж, “MongolZ” баг хоёрдугаарт жагсаж эхэллээ.
Өнгөрсөн амралтын өдөр Лондон хотноо өндөрлөсөн “Blast Open Fall” тэмцээний дараа энэхүү чансааг шинэчилсэн нь энэ. Лондоны тэмцээний аварга Германы
“G2” баг долоон байр ахиж, чансааны тав руу дэвшсэн бол Оросын “Spirit” хоёр байр ухарчээ.
Харин “MongolZ”, “MOUZ” баг тус бүр нэг байраар урагшлав. Дэлхийн чансааг Францын “Vitality” баг тэргүүлсэн хэвээр байна. “MongolZ” баг 800 оноотойгоор Азидаа илт тасархай тэргүүлж байгаа бөгөөд тэдний ард эрэмбэтэй Хятадын “TYLOO” 171, “Lynn Vision” 105 оноотой аж.
Манай бусад багаас “The Huns” Азийн чансааны тавд, “Chinggis Warriors” зургаад, “Eruption” долоодугаар жагсаж байна.
