Ulaanbaatar
М.Уранцэцэг, Д.Сумъяа нар ОУЖБХ-ны чансааг тэргүүлж байна
МОНГОЛЫН МЭДЭЭ | СПОРТ
Олон улсын жүдо бөхийн холбоо /ОУЖБХ/-ноос энэ сарын 2-ны өдөр жүдочдын шинэчилсэн чансааг гаргахад манай улсын эмэгтэй жүдочдоос М.Уранцэцэг, Д.Сумъяа нар өөрсдийн жиндээ нэгдүгээрт эрэмбэлэгджээ.
Уг чансааны “Рио-2016” зуны олимпийн наадмаас хойш гаргаж байгаа анхны чансаа болохоор нэлээд өөрчлөгдсөн байна. Харин энэ шинэчилсэн чансаагаар манай хоёр бөх ийнхүү дэлхийн шилдгүүдийг тэргүүлсэн хэвээр байгаа юм. Тодруулбал, эмэгтэйчүүдийн 48 кг-д гавьяат тамирчин М.Уранцэцэг 2790 оноогоор тэргүүлсэн бол 57 кг-д Риогийн олимпийн наадмын мөнгөн медальт, гавьяат тамирчин Д.Сумъяа 3530 оноогоор тэргүүн байрт бичигдсэн байна.
Манай тамирчид өнгөрсөн долоо хоногт болсон Токиогийн Их дуулгаас алт /М.Уранцэцэг/, хүрэл /Д.Сумъяа/ медаль хүртсэн юм. Дашрамд дуулгахад, дэлхийн чансааг тэргүүлсэн бөхчүүдэд 10 мянган доллараар шагнадаг.
Д.Өлзий
