Ulaanbaatar
Манай бөхчүүд Энэтхэг, Иран, Туркийн багтай нэг хэсэгт багтжээ
МОНГОЛЫН МЭДЭЭ | СПОРТ
Чөлөөт бөхийн Дэлхийн цомын аварга шалгаруулах тэмцээнд оролцох шилдэг наймд багтсан манай улсын шигшээ баг Иран, Турк, Энэтхэгийн багуудтай “Б” хэсэгт орсон байна.
Харин “А” хэсэгт Азербайжан, АНУ, Гүрж, ОХУ-ын багууд багтжээ. Энэ хоёрдугаар сарын 16-17-нд Иран улсын Керманшах мужид болох эрэгтэй багуудын Дэлхийн цомын төлөө тэмцээний сугалаа өчигдөр буюу мягмар гарагт Дэлхийн бөхийн нэгдсэн холбоо /ДБНХ/-ны төв байранд болсон байна.
Иран улсын Гадаад хэргийн яамнаас АНУ-ын багийг тус улсын хилээр нэвтрүүлэхийг хориглох тухай шийдвэрийг гаргасан байв. Харин Иран улсын Засгийн газраас уг асуудалд нааштай хандаж ДБНХ болон Ираны бөхийн холбооны хүсэлтийг хүлээн авч АНУ-ын багт виз олгохоор болжээ.
Д.Өлзий
