Ачаалж байна…
Ачаалж байна…
Montsame News Agency

Сүхбаатар, 2026 оны арваннэгдүгээр сарын 13 /МОНЦАМЭ/. Чадварлаг багш-Чанартай сургалт-Амжилттай суралцагч. Сэлэнгэ аймгийн боловсролын салбарын энэхүү зорилт нь багшийн хөгжлөөр дамжуулан суралцагч бүрийн сурлагын амжилтыг ахиулахад чиглэж байна.
Энэ утгаар Сэлэнгэ аймгийн Боловсролын газар “Хүртээмжтэй боловсрол академи” ТББ-тай хамтран элсэлтийн шалгалтын амжилтыг ахиулах, сургалтын чанарыг сайжруулах зорилгоор ерөнхий боловсролын сургуулийн багш нарын мэргэжил, арга зүйн сургалтыг хоёр дахь жилдээ зохион байгууллаа.
Энэ удаагийн сургалтад аймгийн 34 сургуулийн найман судлагдахууны чиглэлийн 272 багшийг хамруулсан байна. Сургалт нь багш нарын мэргэжлийн онолын мэдлэг, заах арга зүй, үнэлгээний арга барил, ур чадварыг дээшлүүлэхэд чиглэжээ.
Сургалтыг элсэлтийн шалгалтын даалгавар боловсруулах чиглэлээр туршлагатай, зөвлөх болон тэргүүлэх зэрэгтэй багш, мэргэжилтнүүд удирдан явууллаа. Ингэснээр багш нар хичээлийн агуулга, шалгалтын даалгаврын онцлог, суралцагчдын мэдлэг, чадварыг үнэлэх арга зүйн талаар мэргэжлийн түвшинд суралцаж, эзэмшсэн мэдлэг, арга барилаа сургалтын үйл ажиллагаандаа хэрэгжүүлэх боломж бүрдэж байгаа юм.
Энэхүү сургалтыг зохион байгуулах болсон нэг гол үндэслэл нь элсэлтийн шалгалтын сүүлийн хоёр жилийн үр дүн юм. Их, дээд сургууль, коллежид элсэгчдийн мэдлэг, чадвар, суралцах ерөнхий чадамжийг үндэсний хэмжээнд нэгдсэн стандартаар үнэлдэг элсэлтийн шалгалтын хэмжээст онооны дундаж 2025 онд 496 байсан бол 2026 онд 502 болж, таван оноогоор өссөн үзүүлэлттэй байгаа.
Гэвч хичээл тус бүрээр авч үзвэл үр дүн харилцан адилгүй байв. Тухайлбал математик, нийгмийн ухаан, орос хэл, физик, химийн хичээлийн хэмжээст онооны дундаж 10.4-129.4 оноогоор ахисан бол монгол хэл, англи хэл, газар зүй, биологи, түүхийн хичээлийн дундаж 0.7-20.1 оноогоор буурчээ. Мөн есөн хичээлийн хэмжээст онооны дундаж улсын дунджаас доогуур байгаа нь багшийн мэргэжлийн хөгжил, сургалтын арга зүйд илүү анхаарах шаардлагатай байгаа юм.
Тиймээс элсэлтийн шалгалтын үр дүнд тулгуурлан сургалтын чанарыг сайжруулах хэрэгцээтэй судлагдахууны багш нарын онолын мэдлэг, заах арга зүй, үнэлгээний ур чадварыг дээшлүүлэх, суралцагчдын хэмжээст онооны дунджийг нэмэгдүүлж, улсын дундаж түвшинд хүргэх зорилгоор энэхүү сургалтыг хоёр дахь жилдээ үргэлжлүүлэн зохион байгуулжээ.
Багшийн мэргэжлийн хөгжлийг дэмжих нь зөвхөн нэг удаагийн сургалтаар хязгаарлагдахгүй, сургалтын өдөр тутмын үйл ажиллагаанд чанарын өөрчлөлт бий болгох тасралтгүй үйл явц юм. Иймд багш нарын эзэмшсэн мэдлэг, арга зүй суралцагчдын сурлагын ахиц, шалгалтын бодит үр дүнд хэрхэн нөлөөлж байгааг үнэлэх нь цаашдын ажлын чухал үзүүлэлт болно.