Ачаалж байна…
Ачаалж байна…
Монцамэ

Улаанбаатар, 2026 оны аравдугаар сарын 5 /МОНЦАМЭ/. Монголын үндэсний бөхийн холбооноос өнгөрсөн амралтын өдрүүдэд 2026-2027 оны улиралд намрын нээлтийн барилдааныг зохион байгуулахдаа энэ жилийг “Ёс зүй, хариуцлагын жил” болгон зарлалаа
Улс, аймгийн цолтнуудын нээлт бямба гарагт болсон бол сумын цолтнуудын барилдааныг өчигдөр нээв. Нээлтийн үеэр МҮБХ-ны тэргүүн Ц.Магалжав бөхчүүдэд хандан үг хэлсэн бөгөөд ёс зүйтэй байхыг эрхэмлэхийг захив.

Тэрбээр нээлтийн үеэр “Монгол үндэсний бөх бол үе үеийн ахмад буурлуудаас үр хойчдоо уламжлан зуун зууныг дамжин бидэнд ирсэн үнэт өв билээ. Спортын болон нийгмийн салбарын эрдэмтэн судлаачдын өнөөдрийг хүртэл хийсэн олон судалгаануудаас харвал одоогоос 150-200 жилийн өмнө байсан зарим тоглоом, наадгайг спортын төрөл, зүйл гэж тооцвол өнөөдөр тэдгээрээс 50 гаруй төрөл нь устсан гэж дүгнэсэн байгааг онцлон анхаарах хэрэгтэй. Үүнээс тодорхойлбол үндэстэн, ястан, овог аймаг нь мөхөхөд даган мөхсөн нь 35 хувь, өөр бусад улс орны эрхшээлд орж устсан нь 27 хувь, хөрш болон колончлогдсон үндэстнийхээ соёлд уусч, саармагжсанаас хөгжих боломжгүй болсон нь 16 хувь, нийгмийн хөгжил буюу цаг үетэйгээ уялдаагүйгээс 22 хувь нь түүх болон үлджээ. Өнөө цагт барилдаж байгаа бөхчүүдийн сум, аймаг, дүүрэг, улсын баяр наадамд хэрхэн барилдаж байгааг анхаарах цаг нэгэнт болжээ. Сумын болон зарим аймгийн наадам үзэгчгүй болж байгааг бүх шатандаа мэднэ. Энэ харамсалтай үйлдлийг улсын баяр наадам руу хавтгайран орж ирэхээс хамгаалах, мөн сум, аймгийн наадмыг бөхчүүд үймүүлж байгаа байдлыг даруй таслан зогсоох нэн шаардлагатай боллоо. Үндэсний бөх энэ цаг үед үзэгч олон түмнийхээ хүсэл сонирхолд нийцэж байх зайлшгүй шаардлагатай.
Үүний тулд хууль, эрх зүйн шинэчлэл хийх зайлшгүй шаардлага тулгарныг дурдъя. Өнөөдрийн хувьд хамгийн их тулгамдсан асуудал нь бөхчүүдийн ёс зүй болж байна. Иймээс энэ жилийг “Ёс зүйг эрхэмлэх жил” болгон зарлаж, бөхчүүд ёс зүйн асуудлаас гадна найраа будилаанд оролцохгүй байх хууль эрх зүйн өөрчлөлт шинэчлэлт хийхээр төлөвлөн ажиллах болсныг мэдэгдэе” гэв.
Ташрамд дурдахад, Монголын үндэсний бөхийн холбооноос
• 2022-2023 оныг Үндэсний бөхийг түгээн дэлгэрүүлэх жил,
• 2023-2024 оныг Шударга өрсөлдөөнийг эрхэмлэх жил,
• 2024-2025 оныг Бүтээн байгуулалтыг эрчимжүүлэх жил,
• 2025-2026 оныг Соён гэгээрэл ба бөхчүүдийн нийгмийн хариуцлагыг дээшлүүлэх жил болгон зарлаж байсан юм.