Ачаалж байна…
Ачаалж байна…
Montsame News Agency

Улаанбаатар, 2026 оны арваннэгдүгээр сарын 16 /МОНЦАМЭ/. Боловсролын яамны бодлогын газрын дарга нар нийслэл, аймгийн Боловсролын газрын дарга нартай уулзаж, 2026-2027 оны хичээлийн жилд хэрэгжүүлэх үйл ажиллагаа, 2027 онд боловсролын салбарт баримтлах бодлогын чиглэл, шинэчлэлийн талаар танилцуулж, зөвлөмж хүргэлээ.
Уулзалтаар ерөнхий боловсролын сургуулийн бүтцийн шинэчлэл, төрөлжсөн ахлах сургуулийн хөгжил, дээд, мэргэжлийн боловсролын чанар, сургалтын орчны шинэчлэл, цахим шилжилт, их өгөгдөлд суурилсан шийдвэр гаргалт зэрэг салбарын бодлогын асуудлыг хэлэлцсэн байна.
Энэ үеэр сургуулийн бүтцийн өөрчлөлтийг орон нутгийн хүн амын өсөлт, шилжилт хөдөлгөөн, суралцагчдын тоо, багшлах боловсон хүчний нөөц, сургуулийн хүчин чадал зэрэг үзүүлэлтэд тулгуурлан судалж, төлөвлөх шаардлагатайг онцоллоо. Улсын хэмжээнд ерөнхий боловсролын нийт сургуулийн 76.6 хувь нь 1-12 дугаар ангийн нэгдсэн тогтолцоотой байна. Энэ нь хүн ам сийрэг суурьшсан орон нутагт суралцагчдын тоо цөөнтэй сургуулийн бүтцийн асуудлыг хөндөж байна. Иймд сургуулийн бүтцийн дахин төлөвлөлтийг хийхдээ боловсролын үйлчилгээний хүртээмж, чанар, үр ашгийг цогцоор нь авч үзэхийг зөвлөв.
Мөн төрөлжсөн ахлах сургуулийг хөгжүүлэхдээ бүс нутгийн онцлог, сурагчдын сонирхол, мэргэжлийн чиг баримжаа, багшийн хүрэлцээ, сургалтын орчин, материаллаг баазыг харгалзах шаардлагатайг тэмдэглэв. Одоогийн байдлаар улсын хэмжээнд 30 төрөлжсөн ахлах сургууль үйл ажиллагаа явуулж байна.
Боловсролын бүх шатны байгууллагад сургалтын чанар, үр дүнг сайжруулах нь 2026-2027 оны хичээлийн жилийн гол зорилтын нэг байх аж. Тухайлбал, дээд боловсролын салбарт их сургууль, коллежийн статус, ангилал, эрэмбэ, чансааг шинэчилж, тогтоосон шаардлага, шалгуур үзүүлэлтийн дагуу үнэлэхээр төлөвлөжээ. Чанарын шаардлага хангаж буй байгууллагын үйл ажиллагаанд төрөөс шаардлагагүй оролцоо үзүүлэхгүй бол шаардлага хангахгүй, зөрчил дутагдал гаргасан байгууллагад төлөвлөгөөт болон төлөвлөгөөт бус хяналт шалгалт хэрэгжүүлж, илэрсэн асуудлыг арилгуулах арга хэмжээ авах юм.
Түүнчлэн эрүүл, ногоон, хүртээмжтэй, аюулгүй, ухаалаг сургуулийн үзэл баримтлал буюу “ЭНХАУС”-ыг ерөнхий боловсролын сургуулиас гадна мэргэжлийн болон дээд боловсролын байгууллагад нэвтрүүлэхэд анхаарна. Ингэхдээ сургалтын орчин, материаллаг бааз, нөөц боломждоо тулгуурлан эрүүл, аюулгүй, хүртээмжтэй, байгальд ээлтэй орчныг бүрдүүлэхээр ажиллах юм.
Цахим шилжилтийн хүрээнд 2027 онд боловсролын салбарын их өгөгдлийг бүрдүүлж, нэгтгэн боловсруулах, дүн шинжилгээ хийх, бодлого, төлөвлөлтөд ашиглах ажлыг эрчимжүүлнэ. Ингэснээр сургууль бүрийн сургалтын чанар, үйл ажиллагааны үзүүлэлт, тулгамдаж буй асуудлыг бодит мэдээлэлд үндэслэн үнэлж, шийдвэр гаргах боломж бүрдэх юм.
Мөн сургуулийн өмнөх боловсролын байгууллагад хиймэл оюунд суурилсан туслах багшийг туршилтын журмаар ашиглаж эхэлжээ. Энэхүү шийдэл нь багшийн өдөр тутмын төлөвлөлт, бичиг баримт, тайлан мэдээ боловсруулах зэрэг ажлын ачааллыг бууруулж, хүүхэдтэй ажиллах, тэдний хөгжилд анхаарах бодит цагийг нэмэгдүүлэх зорилготой. Хиймэл оюуны туслах багш нь хүний багшийг орлох бус, мэргэжлийн үйл ажиллагааг нь дэмжих хэрэгсэл юм. Цаашид туршилтын үр дүн, хэрэгцээ шаардлагад үндэслэн ерөнхий боловсролын сургуулиудад үе шаттай нэвтрүүлэхээр төлөвлөж байна.
Ийнхүү 2027 онд боловсролын салбарын бодлогыг сургуулийн бүтцийн шинэчлэл, сургалтын чанар, орчны хүртээмж, цахим шилжилт гэсэн үндсэн чиглэлээр хэрэгжүүлэхээр төлөвлөж байна. Эдгээр бодлогыг орон нутгийн бодит хэрэгцээ, онцлог, судалгаа, нөөц боломжтой уялдуулан хэрэгжүүлж, үр дүнг суралцагч бүрд хүргэхэд нийслэл, аймгийн Боловсролын газрын удирдлагын оролцоо, манлайлал чухал болохыг уулзалтын үеэр онцолсныг Боловсролын яам мэдээлэв.