Ulaanbaatar
Цоохор ирвэсийн идэш тэжээлийн 64 хувь нь янгир байгааг тогтоожээ
ОРОН НУТГИЙН МЭДЭЭ | ӨМНӨГОВЬ
Өмнөговь /МОНЦАМЭ/ Өмнөговь аймгийн үзэсгэлэнт газруудад нэр нь зүй ёсоор орох газрын нэг нь Тост Тосон бумбын уулс юм. Тус аймгийн Гурвантэс сумаас баруун хойш 45 км-т орших Тост Тосон бумбын ууланд ирвэс хамгаалах “Ирвэс” төв ажилладаг. Дэлхийд нэн ховорт тооцогдох болсон ирвэсийн өлгий нутаг ч гэж хэлж болно.
Уг уул нь далайн түвшнээс дээш 2517 метрийн өндөртэй, эгц цавчим оргил, нуруудтай, Цоохор ирвэс болон түүний гол идэш тэжээл болох янгир ямааны гол тархац нутаг бөгөөд одоогоор 800 орчим янгир ямаа байгаа гэж тооцож байна. Цоохор ирвэсийн ялгадсанд хийсэн шинжилгээгээр идэш тэжээлийн 64 хувь нь янгир байгааг тогтоосон байдаг. "Ирвэс" төвийнхөн өнгөрсөн хугацаанд 15 ирвэсийг хүзүүвчилж судалгаагаа явуулахад тэд тогтвортой амьдарч байгаа гэсэн байна.
Тост ууланд говийн бусад уул нуруудын адил ургамлын бүрхэвч, амьтад шувууд бий. 2012 онд тус төвөөс санаачлан Тост уул түүний орчныг Улсын тусгай хамгаалалтад авах санал ирүүлснийг Гурвантэс сумын ИТХ, Өмнөговь аймгийн ИТХ-аас дэмжсэн тогтоол гаргасан юм.
2016 онд УИХ-ын
хаврын ээлжит чуулганы хуралдаанаар “Зарим газар нутгийг улсын тусгай
хамгаалалтад авах тухай” УИХ-ын тогтоолын төслийн анхны хэлэлцүүлгийг
хийж баталсан билээ. Үүнд Тост Тосон бумбын нурууг Улсын тусгай
хамгаалалтад авах санал 81,2 хувиар дэмжигдсэн юм.
