Ulaanbaatar
Шадар сайд Ө.Энхтүвшин НҮБ-ын Суурин зохицуулагчийг хүлээн авч уулзав
МОНГОЛЫН МЭДЭЭ | УЛС ТӨР
Улаанбаатар /МОНЦАМЭ/. Монгол Улсын Шадар сайд Ө.Энхтүвшин НҮБ-ын Суурин зохицуулагч Тапан Мишраг хүлээн авч уулзан харилцаа, хамтын ажиллагааны талаар ярилцав.
Шадар сайд Ө.Энхтүвшин НҮБ нь Монгол Улсын хөгжлийн бодлогыг тууштай дэмжиж ирснийг тэмдэглэв. НҮБ-аас дэвшүүлсэн Тогтвортой хөгжлийн зорилтуудыг тууштай хэрэгжүүлэн 2019 онд “Үндэсний сайн дурын илтгэл”-ээ тайлагнаж “Тогтвортой хөгжлийг хангах үндэс суурь бүрдсэн” гэсэн үнэлгээ авсныг мөн онцоллоо.
Монгол Улс нь хөгжлийн чадавх, нөөц, боломж сайтай орон гэж үздэгээ НҮБ-ын Суурин зохицуулагч Тапан Мишра илэрхийлэв. “НҮБ-аас 2017-2021 онд Монгол Улсад үзүүлэх хөгжлийн тусламжийн хүрээ“ баримт бичиг хэрэгжүүлдэг. ”Хөгжлийн хүртээмжтэй өсөлт, байгалийн нөөцийн тогтвортой менежментийг дэмжих, Нийгмийн хамгааллыг сайжруулах, нийгмийн чанартай, тэгш үйлчилгээг нэмэгдүүлэх, Олон нийтийн оролцоо, хариуцлагыг бэхжүүлэх” гэсэн үндсэн чиглэл бүхий 79 сая ам.долларын төсөл, хөтөлбөрт үнэлгээ өгч, хөгжлийн шинэ баримт бичиг боловсруулахаар төлөвлөж байгааг хэллээ. Цаашид харилцан уялдаатай, нэгдмэл, залгамж чанартай, тогтвортой байдлыг хангасан, сайжруулсан бодлого боловсруулж хэрэгжүүлэх шаардлагатай гэдэгт талууд санал нэгдлээ.
Уулзалтаар үер, ой, хээрийн түймэр, зуд, ган гачиг, малын гоц халдварт өвчин, газар хөдлөлт зэрэг гамшгийн эрсдэлийг бууруулах, гамшгаас урьдчилан сэргийлэх, бэлэн байх чиглэлээр хамтран ажиллах талаар санал солилцов.
