Ulaanbaatar
Ази тивийн сүү үйлдвэрлэлийн Нарийн бичгийн дарга нарын газрыг Улаанбаатарт байгуулна
МОНГОЛЫН МЭДЭЭ | НИЙГЭМ
Улаанбаатар /МОНЦАМЭ/. Ази тивийн сүү үйлдвэрлэлийн нарийн бичгийн дарга нарын газрыг Монгол Улсын нийслэл Улаанбаатар хотноо энэ онд байгуулна.
НҮБ-ын Хүнс, хөдөө ахуйн байгууллагаас санаачлан “Dairy Asia” Ази тивийн сүү үйлдвэрлэлийн индрийг 2014 онд үүсгэн байгуулсан. Энэхүү санаачилгад одоогоор Монгол, Тайланд, Хятад, Шри Ланк, Бутан, Бангладеш, Индонез, Афганистан, Филиппин, Энэтхэг, Мьянмар, Непал, Вьетнам зэрэг Ази тивийн 13 улс нэгдэж ороод байна
Ази тивд нийгмийн хариуцлагатай, байгаль экологид ээлтэй сүүний салбарыг хөгжүүлэх, хөдөө орон нутгийн иргэдийн аж амьдралыг дээшлүүлэх, хүнсний шим тэжээллэг чанарыг сайжруулах, орон нутгийн болон бүс нутгийн эдийн засгийн хөгжил дэвшилд хувь нэмэр оруулахад индэр болох нь тус байгууллагын зорилго юм.
“Ази тивийн сүү үйлдвэрлэл” индрийн үйл ажиллагааг тогтмолжуулах, цар хүрээг нь өргөтгөх, гишүүнчлэлийг нэмэгдүүлэх, Ази тивд сүү үйлдвэрлэлийг тогтвортой хөгжүүлэх зорилгоор Нарийн бичгийн дарга нарын газрыг Улаанбаатар хотод үүсгэн байгуулах саналыг ХХААХҮЯ-наас дэвшүүлсэн.
Саналыг НҮБ-ын Хүнс, хөдөө аж ахуйн байгууллага, Даян дэлхийн тогтвортой мал аж ахуйн хөтөлбөр, Ази Номхон далайн мал аж ахуй, мал эмнэлгийн комисс зэрэг олон улсын байгууллагаас дэмжиж байгаа юм.
Ази тивийн сүү үйлдвэрлэлийн нарийн бичгийн дарга нарын
газрыг Улаанбаатар хотод байгуулах тухай Засгийн газрын 2020 оны 1 дүгээр сарын 8-ны өдрийн 11 дүгээр тогтоолыг баталсан билээ.
